Read Karbi KEBAR 6 Bible Online

KEBAR 6 - Karbi bible

KEBAR 6

¹Anke Moses aphan HEMPHU pulo, “Non Ne recho aphan kopisi klem poma nang thek-longpo. Ne la aphan Nerat aso padamtoi bor-i detpo. Chenamsi la adet pen latum aphan Ne paphlung bor-i detji.”

²Moses aphan HEMPHU pulo, “Ne HEMPHU lo,

³Ne Abraham aphan, Isaak aphan, lapen Jakob aphan jakong theparpik Arnam ason cheklang-lo, bonta Ne latum aphan HEMPHU,

⁴Ne men kangthir chethanthelang. Ne latum pen kechejok aloh chepathik-lo, Kanaan adet alongle piji pusi chechak-lo, halaso adet aphrangke latum bang adet aso asonsi dolo.

⁵Non Ne Israel atum keningrijo ase arjulong-lo, atheke Ijip atum latum aphan ban pinchongdet-lo, lapen kechejok aloh Ne ning chematha damlo.

⁶Nesi Israel aso aphan kepulo pura latum aphan thannon, ‘Ne HEMPHU lo, Ne nangtum aphan nangpajokpo, lapen Ijip aso arideng ban kedonang pen nangpajokpo. Latum aphuthak pherememe aduk kepijisi Ne jakong kethepik ari chirungpo, lapen Ne nangtum aphan nangpajokpo.’

⁷‘Ne nangtum aphan Ne methang amonit nangpaplangpo, lapen Ne nangtum a-Arnam plangpo. Ijip along nangtum aphan Ne ban pen nang kepajok thek-longsi nangtum Ne HEMPHU, nangtum a-Arnam lo pu chinipo.

⁸Ne Abraham aphan, Isaak aphan lapen Jakob aphan kepiji pu kechak alongle along nangtum aphan Ne nangvanpo; lapen la nangtum kechepahemphuji aphansi nangpidetpo. Ne HEMPHU lo.’”

⁹Laso alam Moses Israel aso aphan thanlo, bonta alangli lam latum arjudun long-lo, pima halatum ban kechenek pen ajok latum aning runhup-lo.

¹⁰Anke Moses aphan HEMPHU pulo,

¹¹“Damra Ijip arecho aphan thannon, Israel atum aphan alangli det pen padam-longvek nangji.”

¹²Bonta Moses thak-lo, “Israel atum anta ne karjujele, kopusonsi rechole nekarju poma? Neli ke lam ningje thekthe-o.”

¹³Moses lapen Aaron aphan HEMPHU hukum pilo. “Israel aso atum lapen Ijip arecho aphan punon, Ne si Ijip adet pen Israel atum aphan kepajaponjisi nangphan ne hukum kepilo pu thannon.”

¹⁴Jakob asopo akleng, Reuben, asopomar banghini dolo: Hanokh, Pallu, Hezron lapen Karmi; latum ke amen keche-ir aro-heihei atum aphusar atumlo.

¹⁵Simeon ta asopo bang throk do: Jemuel, Jamin, Ohad, Jachin, Zohar lapen Shaul, la Kanaan animsopi asolo; latum ke latum amen keche-ir aro-heihei atum aphusar atumlo.

¹⁶Levi aso bang kethom do: Gershon, Kohath lapen Merari; latum ke amen keche-ir aro atum aphusar atumlo. Levi ningkan 137 an reng-lo.

¹⁷Gershon asopo bang hini do: Libni lapen Shimei lapen latum apoton ongdung.

¹⁸Kohath asopo bang phli do: Amram, Izhar, Hebron, Uzziel lapen Kohath ningkan 133 an reng-lo.

¹⁹Merari asopo bang hini do: Mahli lapen Mushi. Lahei helo Levi aro-heihei lapen apoton atumlo.

²⁰Apo angjir Jokhebed aphan Amram chepangrilo, bangpi la aphan Aaron lapen Moses amahang pathekpilo. Amram ningkan 137 an reng-lo.

²¹Izhar asopo bang kethom do: Korah, Nepheg lapen Zikri.

²²Uzziel ta asopo bang kethom do: Mishael, Elzaphan lapen Sithri.

²³Aaron ke Elisheba aphansi chepangrilo, bangpi ke Amminadab asopilo lapen Nahshon angjirlo; la aphan bangpi Nadab, Abihu, Eleazar lapen Ithamar amahang pathek pilo.

²⁴Korah asopo bang kethom do: Assir, Elkanah lapen Abiasaph; latum ke Korah arobahang aphusar atumlo.

²⁵Aaron asopo, Eleazar ke Putiel asopi atum angbong pen inut abang phan chepangrilo, bangpi la aphan Phinehas amahang pathek pilo. Lahei helo Levi akhei lapen aro-heihei ahemtun kur asarlo.

²⁶Aaron lapen Moses atum aphansi HEMPHU pulo, “Israel atum aphan Ijip adet pen japonnon.”

²⁷Latumsi Israel aso kepajokji aphan Ijip arecho aphan kepu amonit atumlo.

²⁸Ijip adet along HEMPHU Moses aphan keningje ahut,

²⁹Alangli pulo, “Ne HEMPHU lo. Ne nangphan nangkethan alam an Ijip arecho aphan thannon.”

³⁰Bonta Moses thak-lo, “Nang chini neke lam ningje thek-o-e; nephan kosonsi recho nekarju poma?”