Read Karbi KEBAR 7 Bible Online

KEBAR 7 - Karbi bible

KEBAR 7

¹HEMPHU pulo, “Recho aphan nangke inut a-arnam ason Ne paplangpo, lapen nang ik Aaron ke inut amontri asonsi alangliphan ningjepo.

²Ne nangphan nangkepu alam an Aaron aphan than-etnon, lapen recho abang Israel atum aphan det kepa-ojisi pupo.

³Bonta Ne recho aning pangtangrakji, lapen Ijip adet along angthek-heihei lapen manghumeme ason-heihei Ne pa-ong seta,

⁴recho nanglam arjujedetji; anke Ijip adet aphuthak Ne pasungpikpo, lapen det pen Ne rat aphan padamlongpo.

⁵Ijip aso atum aphuthak Neri kechirung ahut lapen Israel aso atum aphan halatum adet pen kevandet ahut latum Ne helo HEMPHU pu latum chinipo.”

⁶Moses lapen Aaron atum HEMPHU hukum kepi atengsi klemlo.

⁷Halaso ahut latum recho aphan kepu ahut Moses ke arta ningkan throknerkep-lo, lapen Aaron abang ke throknerkep-ra kethomlo.

⁸Moses lapen Aaron aphan HEMPHU pulo,

⁹“Jongsi manghumeme akam keklem pen ajok nangtum aporman paklang nangji pu recho nangpu pulote Aaron aphan achin pacheponnon lapen la recho angno pavarchornon lapen la pherui cheplangdetpo.”

¹⁰Lasi Moses lapen Aaron atum recho along damlo lapen HEMPHU kepu ateng latum klemlo. Recho lapen la achakri atum angno Aaron abang chin varchorlo, lapen la pherui cheplangdet-lo.

¹¹Anke recho abang la kethek-kere lapen mekbin akam keklemthek atum aphan hang-lo, lapen halatum amekbin pen ajok halatum asonthot latumta klemlo.

¹²Latumta achin chevarlo, lapen latum achin pherui cheplang-lo. Bonta halahei aphan Aaron achinsi joi-et-lo.

¹³Bonta recho aning ingtangrak bomlang, lapen HEMPHU kepu asonthot, Moses lapen Aaron alam recho arjujelo.

¹⁴Anke Moses aphan HEMPHU pulo, “Recho aning ingtangpik lapen rat atum aphan kepadamji molo.

¹⁵Lasi alangli adapprang Nil Aroi anat kedam ahut-le damra chetong dunnon. Pherui kecheplang achin nanglong cheponnon, lapen alangli phan langroi akung along inghongding non.

¹⁶Anke recho aphan punon, ‘HEMPHU, Ibri atum a-Arnam si nangliphan Alangli rat aphan kepadamtoijisi neliphan netoilo, anke latum kejejangtang ajo Alangphan archo longpo. Bonta nonpu anta nangli arjuje.

¹⁷Non recho, HEMPHU pulo, Alang keklemji akam pen Alang komatma nangli chinipo. Langtha, neli laso achin pen langroi athak thengpo, lapen lang vi cheplangdetpo.

¹⁸Lang-ok thipo, aroi nemthupiksi Ijip aso atum lang jun un-e det-po.’ ”

¹⁹Moses aphan HEMPHU pulo, “Aaron achin kecheponjile lapen Ijip adet kedo-an aroi-heihei, langteng-heihei aphuthak langdungpo. Lang vi cheplangpo, lapen det adang bithe vi dothippo, thengpi atibuk lapen arlong atibuk-heihei arlo anta vi dopo.”

²⁰Anke Moses lapen Aaron atum HEMPHU hukum kepi ateng klemlo. Recho lapen achakri atum angno, Aaron abang achin chirung-lo, lapen langroi athak theng-lo, lapen la along kedo alang an vi cheplangdet-lo.

²¹Langroi arlo kedo a-ok anta thi-et-lo, lapen la nemthupiksi Ijip aso atum la pen jun un-e det-lo. Ijip adet bithe-bitha ta vi saidelo.

²²Anke recho amekbin keklem atumta halatum amekbin pen halatum keklem asonthotsi klemlo lapen recho ke aphrang asonthotsi aning ingtangrak-lo. HEMPHU kepu asonsi, recho ke Moses lapen Aaron alam arjuje lo.

²³Kalilesi la chetevarsi lapen laso aphuthak ano chevarvesi ahem chedamjuilo.

²⁴Ijip atum an langroi akungsoding tuk-lo lang kejunji aphan, pima latum aroi pen lang jun un-e det-lo.

²⁵HEMPHU langroi aphuthak thengdet aphi ni throksi an damtang-lo.