Read Karbi KEBAR 8 Bible Online

KEBAR 8 - Karbi bible

KEBAR 8

¹Anke Moses aphan HEMPHU pulo, “Recho along damra HEMPHU si kepulo pura than damnon, Nerat atum aphan padam longnon, anke latum Nephan Ne archo longpo.

²Jongsi nang kroimolo, pulote Ne nangdet aphuthak chongho pen paplengsetsi aduk nangpiji.

³Nil Aroi lapu-an chongho pen plengsetji, latum nang hem arlo, nang kesang angdeng arlo, nang hongplang athak, nang ban atum lapen nang rat atum ahem-heihei arlo lutdamtoipo, lapen nangtum alongthu, ketun-kedang aphule bithe-bitha arludam pakpo.

⁴Latum nangtum aphuthak lapen nang chakri atum aphuthak arlurippo.”

⁵Moses aphan HEMPHU pulo, “Langroi-heihei aphuthak Aaron achin pathengnon, dong-heihei lapen langteng-heihei aphuthak lapen Ijip adet aphuthak chongho atum pavangnon.”

⁶Lasi lang aphuthak Aaron la bat-lo, lapen chongho vangsi det adang bithe plengset-lo.

⁷Bonta mekbin keklemthek atum mekbin klemlo, lapen latumta det athak chongho pavang-lo.

⁸Moses lapen Aaron aphan recho hangsi pulo, “Chongho-heihei kepapondetjile HEMPHU aphan ardomnon, lapen ne nang rat aso aphan padam longpo, anke latum HEMPHU aphan athok ajir pilongpo.”

⁹Moses recho aphan thak-lo, “Neli nanglitum aphan nang kardom piji aphan ning arongparpo. Isi aporle thik pamenon, komantusi ne nangli lapen nangli rat atum aphan kardompi nangjima. Anke nangli chongho pen jokpo lapen Nil Aroi apar nahokta avedetpo.”

¹⁰Recho thak-lo, “Penap neliphan ne-ardompitha.” Moses pulo, “Nangli kepu asonthotsi neli klempo, lapen HEMPHU, netum a-Arnam ason akaprek arnam ave pu nangli chinilo.

¹¹Nangli, nangli chakri atum lapen nangli rat atum chongho pen jokpo, lapen Nil along apar nahokta avedetpo.”

¹²Anke Moses lapen Aaron atum recho aphan olo, recho aphuthak kevang achongho-heihei kepaponjisi Moses HEMPHU aphan ardomlo.

¹³Moses kehang ateng HEMPHU klemlo, lapen hem-heihei arlo, chetai ajo, lapen hidi ajo achongho an thi-et-lo.

¹⁴Ijip aso atum det panemthu-prangpretik an lahei pangsomsi thedung abui builo.

¹⁵Chongho an thi-et thek-longsi, recho puthot aning ingtangthurak-lo, lapen HEMPHU kepu asonthotsi, Moses lapen Aaron alam recho arjudun long-lo.

¹⁶Moses aphan HEMPHU pulo, “Achin pen longle athak kepathengjile Aaron aphan punon, lapen Ijip adet alongle aduk an chitim cheplang-etpo.”

¹⁷Lasi achin pen Aaron longle athak arbulo, lapen Ijip adet alongle aduk an chitim cheplang-et-lo, lapen lahei monit lapen pi atum aphuthak borthip-lo.

¹⁸Mekbin keklemthek atum halatum amekbin pen klemlo, seta latum chitim paklang thekthe det-lo. Bithe-bitha ta chitim do thip-lo,

¹⁹lapen mekbin keklemthek atum recho aphan pulo, “Arnam si la keklemlo!” Bonta rechoke aning ingtang-o lang lapen HEMPHU kepu asonthak-thaksi, recho abang Moses lapen Aaron alam arjudun long-lo.

²⁰Moses aphan HEMPHU pulo, “Penap adapprang damra recho aphan la langroi anat kedam ahut chetong dunnon, lapen HEMPHU-si kepulo pu thannon, ‘Ne rat aso aphan padam-longnon, anke latum nephan Ne archo unpo.

²¹Ne nangphan pacheretoilo, nang jongsi kroimolo pulote, nang phuthak, nang chakri atum aphuthak, lapen nang rat atum aphuthak bitu-heihei nangketoi pen ajok aduk nangpiji. Ijip aso ahem-heihei bitusi plengsetpo, lapen longle la pensi dipthippo.

²²Bonta Goshen alongri hadak Ne rat atum kedo adim ke Ne paprekji, anke hadak bitu ejonnat ta ave detpo. Ne la klemji, anke laso adet along Ne helo HEMPHU, Ne si klembomlo pu nang chinipo.

²³Nang rat aso pen Ne rat aso angbong Ne paprekdakji. Laso kemanghumeme ke penapsi klangpo.’ ”

²⁴Ahur kethedung abitu HEMPHU nangtoilo, rechohem arlo bithe lapen achakri atum ahem bithe palutpak-lo. Ijip adet adang bithe bitu-heihei pen ajok akevir vang-lo.

²⁵Anke Moses lapen Aaron aphan recho hangsi pulo, “Dak adet-le damra nang Arnam aphan athok pidamnon.”

²⁶Lason keklem ke memedetpo, Moses thak-lo, “Pima netum a-Arnam HEMPHU aphan karkli lapen netum kepajir athok thek-longsi Ijip asor aning oi-lakji. lapen latum netum aphan arlong pen nevarboppo.”

²⁷“Netum a-Arnam, HEMPHU aphan athok kepiji aphan dak pen kejejangtang ajo anat Alang hukum nekepi ateng nithom dam nangji.”

²⁸Recho pulo, “Nangtum jongsi kedam pahelo o-e pulote kejejangtang ajo nang Arnam, HEMPHU aphan athok kepiji aphan nang padam longji. Nephanta ne ardompitha.”

²⁹Moses thak-lo, “Neli nangli, nangli chakri lapen rat aphan bitu-heihei ke-oji aphan HEMPHU aphan neli ardom dampo. Bonta nangli nelitum aphan puthot nepachobei nangnelo lapen HEMPHU aphan rat atum kethokji aphan nangkhang dun nangnelo.”

³⁰Recho aphan Moses otekang-lo, lapen HEMPHU aphan ardomlo,

³¹lapen Moses kehang ateng HEMPHU klemlo. Recho, achakri atum aphan lapen rat atum aphan bitu olo; ejonnat ta sasedet-lo.

³²Bonta recho ke non aphong jokta aning ingtangrak-lang, lapen puthot la rat atum aphan padam longledet-lo.