Read Karbi KEBAR 9 Bible Online

KEBAR 9 - Karbi bible

KEBAR 9

¹Moses aphan HEMPHU pulo, “Recho along damra Ibri atum a-Arnam, HEMPHU si kepulo pu than damnon, ‘Ne rat aphan padam longnon, anke latum Nephan Ne archo unpo.

²Jongsi nang latum aphan padam longle pulote,

³nang kepangreng api nang losei, gadha, ka-ut, chainong, biresak lapen bi atum aphuthak kepherememe akeso kevan pen ajok nangphan Ne aduk nangpiji.

⁴Israel aso atum api-heihei lapen Ijip asor api-heihei angbong ne paprekji, Israel aso atum kechepahemphu api an thithedetpo.

⁵Laso akam keklemjisi Ne, HEMPHU si penap arni pathik-lo.’”

⁶Puthot arni Alang kepu ateng HEMPHU klemlo, lapen Ijip asor api an thi-et-lo, bonta Israel aso atum api ejonnat ta thithedet-lo.

⁷Kopi plang-loma pu recho arjulo, lapen Israel atum api ejonnat ta thithedet-lo pu thanlo. Bonta la aning ingtang bomlang, lapen rat aphan padam longlelang.

⁸Anke Moses lapen Aaron aphan HEMPHU pulo, “Mehip pen ajehak athek-lo achikip entha; recho angno Moses si lahei tomon along pangjardun-pung-po.

⁹Lahei Ijip adet adang bithe longle aduk keme asonsi chehijikjamlo, lapen alongtin lahei amonit lapen pi atum aphuthak pangthumsi amek ingdakpo.”

¹⁰Lasi latum ajehak athek-lo enlo, lapen recho angno Moses abang arjapsi lahei tomon along hijikjamlo, lapen lahei ingthum cheplangsi amek ingdak-lo monit lapen pi atum aphuthak.

¹¹Moses angno mekbin keklemthek atum cheklang haihedet-lo, pima latum aphanta ingthumsi dipthip-lo, akaprek Ijip asor atum ason thakthak-lo.

¹²Bonta recho aphan HEMPHU aning pangtangrak-lo, HEMPHU kepu asonthotsi, recho abang Moses lapen Aaron alam arjudun long-lo.

¹³Moses aphan HEMPHU pulo, “Penap adapprang recho aphan chetong damra, lapen la aphan Ibri atum a-Arnam, HEMPHU si kepulo pura thannon, ‘Ne rat aso aphan padam longnon, anke latum nephan Ne archo longpo.

¹⁴Non aphong ke nang chakri atum lapen nang rat aso atum aphan chot lapu kali, nangphanta ne aduk nangpiji, anke pirthe adang bithe Ne son baduta avelo pu nang chinipo.

¹⁵Ne jongsi nangphan lapen nangrat aphan keso pen kepaphojile Neri chirung lote, nangtum virklung khangjangpo.

¹⁶Bonta nangphan Nejakong kepaklemjisi Ne nangphan pareng-long-lo, anke Nenong pirthe adang bithe chethangphlup po.

¹⁷Tebonseta nangning ingtangrak bomlang lapen Ne rat aphan padamlonglelang.

¹⁸Penap laso apor Ne herai kethe paklopo, lason Ijip aphurkimo along avepin lang.

¹⁹Non nang kepangreng api kedo-an lapen hidi ajo kedo-an api kechepachongjile hukum-heihei pinon. Ingtan keraire amonit lapen api atum aphuthak herai nangklopo, lapen latum thilotpo.’”

²⁰HEMPHU kepu alam apotsi ajehak recho achakri atum ke phereduk-lo, lapen kejok kelongjisi halatum aban atum aphan lapen api atum aphan arlo van-et-lo.

²¹Akaprek atum, tebonseta HEMPHU kepacheretoi alam aphuthak ano chevar vangvedet-lo, lapen aban atum lapen api atum aphan ingtansi bikurlo.

²²Anke Moses aphan HEMPHU pulo, “Sining-inghun anat nangri chirungnon, lapen HEMPHU cheter lapen herai Ijip adet adang bithe lapen arat aphuthak, pi aphuthak, hidi ajo lapen rit aphuthak nangtoipo.”

²³Lasi Moses alangli chin sining-inghun anat jarding-lo, lapen HEMPHU sining ame, cheter nangtoisi longle athak paklolo.

²⁴HEMPHU kethenei ahirkedo aherai nangtoisi pu-pu sining pabirlakchenlo. La ke Ijip adet aphurkimo along kehingnonei atomon thepilo.

²⁵Ingtan kedo an amar Ijip adet angbong herai chok-lo, monit kedo-an lapen pi kedo-an aphuthakta. La kedo-an hidi ajo athengpi lapen arong-heihei choksi ingdi-et-lo.

²⁶Goshen alongri, atheke Israel aso atum kedo adimsi herai keklokle chot-lo.

²⁷Moses lapen Aaron aphan recho pahang si pulo, “Non aphong ke ne pap klemdet-lo; HEMPHU ke ahokpetsi kedolo, ne lapen nerat atum ke kechokche anatsi kedolo.

²⁸HEMPHU aphan ne ardompitha! Laso acheter lapen aherai netum kelong dorphlup-lo; Nangtum aphan kepadamji aphan ne chechak-lo; Nangtum ladak donangnelo.”

²⁹Alangliphan Moses pulo, “Rongsopi pen ne bardet aphi, HEMPHU aphan kardomjisi neri ne chirungpo. Sining kangder hampo, lapen herai avedetpo, anke pirthe ke HEMPHU amarlo pu nangli chinipo.

³⁰Bonta neli kechini ke nangli lapen nangli chakri atum HEMPHU Arnam aphan phere thekthelang.”

³¹Flax ahon amir lapen soktipliso vir et-lo, pima soktipliso papoktang-lo, lapen flax ahon amir ke kepapulo.

³²Bonta soktipli ke virve, pima la ke aphisi si kemen.

³³Recho aphan Moses otekang-lo, lapen rongsopi angtan barlo, lapen HEMPHU aphan kardomjisi ari chirung-lo. Sining kangder lapen herai, lapen arve kedo-an hamdet-lo.

³⁴Kopi plangtang-loma recho thek-longsi, alangli pap klemthulo. Alangli lapen la achakri atum aphrang asonthot aning chepangtang rak-lo,

³⁵lapen Moses pen ajok HEMPHU kepumek asonsi, recho abang Israel aso atum aphan padamlongle det-lo.