Read Karbi JOB 10 Bible Online

JOB 10 - Karbi bible

JOB 10

¹Ne kevangji aphan aini o-lo. Ne ningkehodak alam arjutha.

²Nephan hingno pu nehok-ri, Arnam. Nethan non! Nephuthak kopi akehingno alam kedoma?

³Nang kechenek mesen ma? Nang methang kepaplengtang amar kehijimke akeme loma? Lapen ajat kelangno atum akemang aputhak kangnekdun-hing la mesen ma?

⁴Netum keklem ason nang lang ma?

⁵Nang chetheta netum achethe ason thihek ma?

⁶Tangte nang kopisi nepap kephurdam loma lapen nedo asontin keridam loma?

⁷Nang chini ne dai ave, nangpen baduta nepajok un-e.

⁸Nangri pen nephan thip-lo lapen pinchong-lo, lapen non la isivet ari pensi nepavirpo.

⁹Chemathatha nang nephan kanghon pen nethip-lo; nang puthot nephan longle-inghan paduk-i ji ma?

¹⁰Nang nephan mahang pathekjisi nepo nepilo; nepei apok arlo nang nepathe toilo.

¹¹Areppi lapen artho pen si nang nebang pinchong-lo lapen areppi aphan angsi lapen areng pen dip-lo.

¹²Nephan nang chethe lapen kanghon-ver ajakong pilo, lapen nang ke-ora nephan pareng-lo.

¹³Bonta non ne chinilo, la kedo-an apor pen nang nephan pasodak jisi mangjoi joi lo.

¹⁴Ne pap klemjima pusi nang cholang ding lo, anke nang nephan kediyaji modet po.

¹⁵Ne pap klemlote, ne nang pen kesung longpo, lapuson lote ne nong avelo. Ne ning duk-lo lapen ketherak pen ne dipthip-lo.

¹⁶Jongsi ne pine pachanlote, hingno ason nechonep po; nereng kepasojisi nang manghu meme akamta klem-lo.

¹⁷Nang kaita nebe pathursi haki pa-enlo, nephuthak nang ningkethi thebom thebomlo; nang kaiketa ajehak mirak atengkheng mang-lo.

¹⁸Arnam, kopisi nang nephan mahang pathek long-toiloma? Nephan badu nethek long aphrang thilot si akeme apot-lo.

¹⁹Nepei apok arlo pen tipit damphit lote, kaita ave pin ason thak-thaksi mesen po.

²⁰Nekai kejut kok-loma laho? Nephan inutvet-le nepado longtha! Ne ke-o apor nephan ning chepajang longtha.

²¹Ne dam serak po lapen vangthuthelo isi kangting lapen kedono adet,

²²kangtingver adet, abin, lapen kemanghu-meme adet, hadak atur ke kangting helo.