Read Karbi JOB 15 Bible Online

JOB 15 - Karbi bible

JOB 15

¹Eliphaz thak si pulo,

²Inut gian kedo abang ale kave alam ningje nangjima, lapen nihang atomon pen chepaplengset apot-loma?

³Nangson badu akere amonit ningjeje mate amo kevangve alam pen chedansi cheraire.

⁴Nang jongsi nang tovar dolo te, Arnam aphan baduta phere abang avelo; baduta laphan ardomde det po.

⁵Nanglam keningje pensi nang hingnolo pu cheklangdak lo; nang kereset alam-heihei keningje pen kepatuji bor-i lo.

⁶Nang hingno pu nangphan ne nanghok teng-ai nangnelo; nanglam athetin nang keningje pen ajoksi hingno pu chehok-tang-lo.

⁷Nang tong pirthe mahang kethekvi amonit-lo putong nang chematha ma? Arnam inglongpi-heihei kepinchong ahut nang doma?

⁸Arnam kepinchongtang kemang alam arjudun long ma? Monit atum agian nanglong tong kedo chotma?

⁹Nang kechinitang ason netum nangkechini dunde ave.

¹⁰Netum agian kecharlilong ke achu keloktang amonit-nangpo mahang thekthe ako mahang kethek amonit atum pen.

¹¹Arnam nangphan kerengme nang pilo; la kopisi nonputa dengmolang ma? Netum la aphan lam kangsam pusi ningje lo.

¹²Bonta nangke nangno dingrongsi netum aphan nangning kethi pen lang-lorlo.

¹³Nang Arnam aphan ningthisi laphan kroikrelo.

¹⁴Inut amonit ahokpet pu ingthir un ma? Inut bak Arnam pen chepame un ma?

¹⁵Kopisi Arnam apherangke atum aphanta chiki ke det ma; latum ta la angno ingthirthe.

¹⁶Monit atum kehingno lang asonsi junlo; Kalang, monit atum aning hingno; monit atum amo vangve.

¹⁷Non arjutha, Job, ne kechini alam.

¹⁸Kere atum nephan ahok alam nethanlo lahei alam latum halatum apo atum pensi charlilo, lapen latum thangnat ta patute det lo

¹⁹Halatum adet bang-adet amonit pen jok-lo; latum aphan Arnam pen kepasui abang ave.

²⁰Inut kehingno amonit bang kaprek aphan kechenek abang rengtik an akesung phoji.

²¹Kephere kehangchir ase la ano angden doverji lapen la jok-lo pu kematha ahut kethiparohum atum laphan tengkhengji.

²²La kangting pen kejokji aning kethe ave pima natne laphan kepathijisi nokjir isi inghong ding lo,

²³lapen takun -heihei la abang arpum kechoji inghong ding-lo. Aphi akai ingtingsang pu la chechini.

²⁴Inut jakong thedung arechoketengkhengji inghong-ding asonthotsi kevir inghong-ding-lo.

²⁵Arnam abe kethur ari kechirung abang lapen jakong kethenei abang aphan kekroikre abang akopai lasonlo.

²⁶Halaso amonit anethe-o lapen thurkrap; la bang alam arjuje si achong chirungpo,

²⁷lapen Arnam kechedanjisi damserak po.

²⁸Halaso amonit rongsopi-heihei cheraidet abang-lo, lapen ahemphu kekattang ahem-heihei cheraidet abang lo, bonta lahei arongsopi lapen ahem ronsi pavir et po.

²⁹La keplang ajir ding-o longle; la kechepahemphu amar an adin avedet ji.

³⁰La aharchita avedet ji, lapen akangting pen chepajok un-e la aro-heihei mekecho athengpi areng asonpo, la apu anta tomon pangjar et po.

³¹La jongsi kelu pen kehingno aphan chikilote kehingnosi la anong-e plangpo.

³²La apor jutje ako, la chekeduji aro kechekedu athengpi asonsi kaita lirtir thekthe det po.

³³La ke drakha atheso pen keklo-et adrakha arong asonlo; lapen angphar keklo-et ajit arong asonlo.

³⁴Arnam kave amonit ke aso-asu avelo, lapen tangka kecho pen kekim ahem ke me pen pavir det po.

³⁵Lahei ke kepasungji kemang lapen kehingno keklem amonit atum lo; halatum aning kechobei pensi plengset.