Read Karbi JOB 18 Bible Online

JOB 18 - Karbi bible

JOB 18

¹Job, bang atum ason nang dojoi un-e ma?

²Nang jongsi karjuji dojoi lote netum nangphan nang-chingki longpo.

³Kopisi netum chainong ason amovangve pu nangphan pamatha long ma?

⁴Nang ningkethi pen nangmethang aphuthaksi nangreng chepaso lo. Nangning kethi apot pirthe rongman cheplang detji ma? Nangphan ningkepangsamji aphan Arnam inglongpi terekchorji ma?

⁵Kehingno atum amelur ke pametchok po, la akar puthot karthuthe lo.

⁶Pehem along la amelur the-ang-e det ji.

⁷La akengkam thirklong, bonta non la patekung-lo, la chingkoilo, amethang akethek kechiki apot.

⁸La lan ajo hat po, lapen la akeng chevurlok po;

⁹pham akeng chedanloksi laphan vungpring po.

¹⁰Longle along pham tot patu po, atovar along phamvur tot po.

¹¹Kepherememe pensi laphan komchenpo; la akengkamtin hungdunkripo.

¹²La plang-o abang lo, bonta non la an kangchir si donang-lo; kevir arjap dingsi la adung inghongding-lo.

¹³La abang bithe pherememe amek saidelo lapen ari-akeng pathuvok lo.

¹⁴La kedo kejok-ran apehem pen laphan ingsek-lo, lapen recho arideng kethinangjisi laphan santhor lo.

¹⁵Non badutame amethang apehem chedotame-la dovai arsidet aphi !

¹⁶La angkur-heihei lapen aso-heihei thikraisi kreng-lo.

¹⁷La anong hem seta ingtan seta ave det-lo, baduta laphan chemathathedet-lo.

¹⁸Kerenglang atum kedo adim pen laphan phlung jui po, Kethe-ang pen phlungsi kangting padopo.

¹⁹La aso-asu avedet po, kerenglang atum avedet po.

²⁰Nihang pen nichi, la akopai karju long atum an, manghuloisi kephere pen a-ok klemhurpo.

²¹Lake kehingno amonit akopai lo Arnam aphan chemathathepin atum akopai lo.