Read Karbi JOB 20 Bible Online

JOB 20 - Karbi bible

JOB 20

¹Job nang nephan ning pa-oilo.

²Non ne kethakji inghong un-e lo.

³Nang keningje tang alam anke kepatherak alamlo, bonta ne chini nangphan kosonsi nangthak nangjima.

⁴Hako ahut pirthe athak monit kebi cheng ahut penta nang chini,

⁵kehingno amonit atum kerengme ajir dingde.

⁶La thebom tahai, sining angsong an, paphore tahai, pu an thesi la aphu inghun phorok seta,

⁷bonta laphan longle aduk asonsi pangjarphit ji. Laphan kechinitang atum la konatsi kedamloma manghuji.

⁸La ajo mek-rengjeng kethek-long ason lapen mang keheman ason avedet ji, lapen puthot thekthu longle det po.

⁹La kedo adim pen avedet po;

¹⁰lapen la asomar atum keboi atum pen chepame po la akai latum voithu po.

¹¹La abang riso ateng lapen thepik bonta prapjin pen la aduk chepharlopo.

¹²Kehingno laphan dokjok po,

¹³la akedok chomatver jisi la angho la ajehak chebiji.

¹⁴Bonta la apok arlo, an chepharlosi hodak po. Bikar ason hodak po.

¹⁵Kehingno abang la kechonghu akhi ching-ok po; Arnam la che-enthudet po, la apok-arlo pen seta.

¹⁶Kehingno amonit kejoi an ke bikar asonlo; la ruiphe abi ason la laphan pathipo.

¹⁷Jit-ajangthu aroi-heihei kethek-longji aphan la reng-relo, mate mok-lang lapen pijo alang keli alangjeng thek-longle lo.

¹⁸La keklem ason an la che-o nangpo, la akhi kechechoji asai chelonglelo,

¹⁹Pima la keduk aphan chenek lo lapen langle det lo lapen bang keklem ahin cherai pi det-lo.

²⁰La kechoboho kaita aning ingsamse.

²¹La kecho ahut, thangta pahin helo, bonta non la kechingthur kejut-lo.

²²La kam pachunbomsi la kedo-an angthin kelangno laphan berlampo.

²³La aningkehang aling pachonang? Arnam laphan aningkethi pen aduk pipo.

²⁴La ingchin anokjir pen kechepajok ahut, isi ingchinke-er athai aso ap-choksi laphan pakrep po.

²⁵La abang thai-aso krongplutpo; la abang pen avi klodop dop po, la aning kephere plengset po.

²⁶La kechobirti ason an virdet po; monit ari kekai ame kalipin ame laphan lapen ahemtun kedo-an aphan chodet po.

²⁷Sining angsong la apap paklangpo, lapen pirthe thursi la ahaki chodunpo.

²⁸La akhi kedo-an pavirdet po. Arnam aningkethi akupthepi pen.

²⁹Lahelo, kehingno amonit akopai Arnam latum aphan kepi akopai.