Read Karbi JOB 22 Bible Online

JOB 22 - Karbi bible

JOB 22

¹Kerenei amonit doma,

²la Arnam aphan ale doma?

³Nang keklem pen Arnam aphan ahok pet pen ale doma, mate nang kedo pen laphan akeme akerap doloma?

⁴Lake pima nang Arnam angno kephere pen karjap apot-le nangphan la ingchek lo lapen asat nanglang-lo lapu kali.

⁵Kali, pima lake nang pap keklem ong apot; nang kehingno keklem-ong apot.

⁶Nangphan nangkorte nangkepi nangji kechechak ateng kepapi jisi la pu nang ape-ari pon et si laphan areng angse tekang-lo.

⁷Kelak atum aphan lang kepiji, nang molo, lapen kangchir atum aphan nang an kepiji molo.

⁸Kedo-an alongle ke en jisi nang jakong lapen nang inghoi cherip lo.

⁹Hemepi atum aphan nang rai muchot lo kali bonta jangreng atum amar nang thilo lapen kehingno pen lang-lo.

¹⁰Lasi non nangdung-nangrei hilik-heihei do-o lo, lapen menmen nang kephere pen plengset lo.

¹¹La thesi pu-an ingting lo nang thek longle det lo, lapen langthepi nangphan inglumchok-lo.

¹²Arnam kangtuinei asining along le kedo kali ma lapen chiklolongso-heihei ingtui olo seta arum nanglangle kalima?

¹³Tebonta nang arjulo, “Arnam kopisi chinilo? La inghun ajosi chepatu-lo kosonsi ephan e-ingsai po?”

¹⁴Nang mathalo, inghun karthat laphan binkuk lo, la sining aphuchong athak kedam ahut seta.

¹⁵Kehingno amonit atum kedunver atovar tong nangta kedunji matha thip loma?

¹⁶Latum apor nanglele ako, latum aphan langthepi pontang-lo.

¹⁷Lahei ke Arnam aphan kedengde atum lo, lapen la latum aphan thangta klem un-e pusi mathalo.

¹⁸Seta Arnamsi latum aphan ta paplang-lo, kehingno atum akematha ne thangta chini dunde.

¹⁹Keme amonit atum chehok lapen adokave atum ingnek lo.

²⁰Kehingno abang chepahemphu amar pavir det tang-lo lapen ahin kedo-an me cho pi et lo.

²¹Non, Job, Arnam pen chepamenon lapen laphan hotur ason kematha ington non; nang jongsi klem lote, la nangphan pahirjumepo.

²²La kepi akethan dengnon, la alam ning chebi non.

²³Kalang, nang chepabihek-ra Arnam anat pangno non lapen nangtum keklem kehingno akam an pavedet non.

²⁴Nangser chevarnon; kemenei aser longdang ajo binon.

²⁵Jakongkethe Arnam nangser paplangnang, lapen la nangphan rup angsom paplangnang.

²⁶Anke nang kaita Arnam aphan chikipo, lapen la helo nangning arong atiri lo pu chini po.

²⁷Nang kardom ahut la nangthak po, lapen nang kechechak aseme nang chebi po.

²⁸Nang keklem ason an chunpo, lapen nang tovar the-angpo.

²⁹Arnam ke anekethe aphan pasun lapen chepabi atum aphan pajok.

³⁰Nang jongsi nangdo-ave pulote la nang pajokpo, nang keklem chokpet lote.