Read Karbi JOB 28 Bible Online

JOB 28 - Karbi bible

JOB 28

¹Rup ketuk adim do; ser kangsir adim-heihei ta do.

²Longle pensi monit atum ingchin tuk lo lapen arlong-heihei pensi tam angchin kelong.

³Karnuknei adim anta monit tukdamlo latum pirthe arlo rilo, lapen kangting ajo arlong tuk lo.

⁴Monit kedo pen heloving mate monit chehelat-le adim, monit atum kechepet abi tuk lo hilik arlo ari along chevek linglang lo.

⁵Kecho amar longle pensi man bonta arlo alongle isinat lo seta kedo-an ta ingsek-i lapen pangje-i

⁶Lang arlong-heihei lir-thing arlong aber do, lapen la aduk sor-o.

⁷La angthor vo atum tovar thek longle lahei athak takun ingjarje.

⁸Hingho lapen kaprek ingnam api lahei atovar damde.

⁹Kangtangnei a-arlong-heihei monit hang-lo, inglongpi hutsi akeng-ri an tuk-lo.

¹⁰Arlong-heihei angbong lang adong hut lo, ador keso abor latum lang-lo.

¹¹Langroi-heihei lang-amek an latum hut lo, lapen kepatu amar paklang-lo.

¹²Bonta bidi komatsi kelongpo? Konatsi eli kechini aphan charli longpo?

¹³Monit along bidi ri seta longle; baduta la ahok ador chinine.

¹⁴Talopi lapen talo aling alongta bidi long damde.

¹⁵La ser-rup pen nam un-e.

¹⁶Aju-kavepin aser lapen dorson-heihei ta la ador chingbar-be.

¹⁷La ser ador an sose, ser, mate lojikeme anta sose.

¹⁸Bidi ador ke arlong abor chithing aphanta ador somu.

¹⁹Kemenei arlong chething-et lapen kemenei aser aphan pen bidi ador pangbar dam no.

²⁰Tangte bidi atiri kelong adim konat? Konat si eli kechiniji aphan charli longpo?

²¹Kereng api an la thek long un-e, kangjar avo atum anta longle.

²²Kethi lapen kevir latum anta arkisi arjulongchot pu chekobirlo.

²³Arnam inut petsi la atovar chini chot, bidi kodak si kelongjima adim chini.

²⁴Pima pirthe kejut an la thek long sining arum asontin ta la thek-long.

²⁵Arnam tomon aphan la ajakong kepi ahut, lapen talo ahoi kepathik ahut;

²⁶Konatsi arve jang nangjima pu Arnam kephar ahut;

²⁷la alongsi alangli bidi thek long-lo, lapen la ador lang-lo, la aputhak alangli pathirlo.

²⁸Monit aphan Arnam pulo, “Keresetjite nang HEMPHU aphan man pivek nangji. Kechini thekji aphan nang kehingno pen suivek nangji.”