Read Karbi JOB 29 Bible Online

JOB 29 - Karbi bible

JOB 29

¹Job puthot ningje thulo,

²Arnam nephan kelangkri ahut ason jongsi nekai la dothulo te.

³Arnam nelong kaike dover lote lapen ne kangting ajo kedam ahut kethe-ang nepi lote.

⁴Halahei arni ne chingthur-o lo, lapen Arnam pen pajirposi nehem nerai lo.

⁵Jakongkethenei Arnam nelong doverlo, lapen nesomar atum nephan nekomchenlo.

⁶Ne chainong api lapen bi api amok-lang ongdung, lapen ne jit athengpi arong arlong ajo seta chanlo.

⁷Rongsopi akesar atum kechingrum along ne inghoi dolo,

⁸Nephan kethek long pen riso atum tovar nepek lo, lapen man kepijisi arlengkesar atum arjapding lo.

⁹Rat ajalin atum kechingki ingtonkokpo,

¹⁰Arnam kedo amonit ta ningjeje det po.

¹¹Nephan kethek long atum mate nelam karjulong atum neklemtang akam keme alam kepuji ason do.

¹²Keduk atum chiru lote, ne rap dunlo; kechori dam adim kavepin jangreng atum aphan ne rap lo.

¹³Kesungpik atum nephan rolo, lapen hemepi atum nekerap longsi latum reng-lo.

¹⁴Ne kaita ahokpet pen lapen mesen pen klemlo.

¹⁵Ne amek keselok atum amek-lo, kengkok atum akeng-lo.

¹⁶Keduk atum aphan ne apo lo, lapen kesung kedamdap aphan rap dunlo.

¹⁷Ne kechenek amonit ajakong pavirlo, lapen latum arideng kepho abang aphan pajok-lo.

¹⁸Ne kaita chethekeding longji aphan ningchethe lapen methang ahem along ingsamjin pen kethiji ning hang-lo.

¹⁹Angkur lang kepho athengpi arong lapen la aro-heihei ar-e pen kecham-e asonsi ne ingtung lo.

²⁰Abangphutin ta nephan nerohurlo, lapen nejakong kaita dover.

²¹Ne kepare ahut rat-atum doklip, lapen ne kepu alam arju pame;

²²Ne keningjetang ahut latum thangnat kebat dunji avelo.

²³Nelamthe arve amu asonsi inglimlo, sai ketiki abang asek arve kevang aning-arong asonsi abangphutin ta nelong chodeng-lo.

²⁴Latum aningkethe kave ahut ne latum aphan ingnek-hing po; ne mahang kangnek-hing thek-longsi latum aning rung-lo.

²⁵Ne arpu dengsi lapen keklemji matha thip lo; recho aron-aso aphan kejapon asonsi ne latum aphan jalo, lapen latum aningkerun ahut ne aning pangsamlo.