Read Karbi JOB 30 Bible Online

JOB 30 - Karbi bible

JOB 30

¹Bonta nephan arta kekom atum non ne-chongthuilo! Latum apo la-an amo kevangve latum abiresak kepatonji aphan ne methan-heihei parap dun ingtungte.

²Latum kepritthang amonit ason nephan kam keklempiji aphan aini-ong.

³Latum pu-an keduk lapen kangchir lo, latum rongman adim-heihei ajo thengpi angkur kekrengtangsi heje lo.

⁴Latum kejejangtang ajo thengpi phursi latum cholo, akedok-kethu avepin arphek arong angkur anta cholo;

⁵Hangjo si abangphutin ta latum aphan phlung-lo, latum kanghu aphan kehangjo asonthot.

⁶Latum longku-longdang ajo si donang-lo.

⁷Latum pi asonsi ingrong-lo, lapen bap ajo bithe klimjamlo.

⁸Isi amokevangve, amen kave ajat! Det pen latum aphan phlungphit lo.

⁹Non latum vangsi nephan ingnek choilo; latum aphan ne thangnat ta kali seta kangnek-i amarlo.

¹⁰Kehijim meme pensi nephan latum nanglang-lo, latum matha latum mepik, lapen vangsi nemahang ingthok-lo.

¹¹Pima Arnam nephan jakong pavelo lapen nerap abang pavelo, un-an aningkethi pen latum nebe thurlo.

¹²Laso ajat nephan tengkheng bomlo; nepakatbomlo; latum nephan patherak padu po.

¹³Ne kejok atovar latum khang-lo, lapen nekepavirji bor-i lo. lapen latum aphan kekhangji baduta avelo.

¹⁴Paisong angkrak pen latum vangpak lo lapen nephu athak asarnung pangje-i lo.

¹⁵Nephan kephere asonsi paplengset lo, neman phek-e le tomon kangjarpon asonsi pondet lo. Lapen ne kechingthur an inghun kepon asonsi pondet lo.

¹⁶Non ne thiji dok-dok lo; nekesung kechechak pen kejok atovar avelo.

¹⁷Ajo nereppi sopo, keso-kechorot kaita ingtonte.

¹⁸Arnam nechethok netumlok-lo lapen nechoi vungchomsi pachedureng-lo.

¹⁹La inghan ajo nephan nevarchorlo, ne keter aphan ta hingno thulang avi.

²⁰Ne nangphan hang-lo, O Arnam, bonta nang nephan thakthe det-lo; lapen nekardom ahut seta nang arjuje det-lo.

²¹Nang nephan nechenek-o lo, nangjakong kedo-an pen nephan nang pasung lo.

²²Nang tomon nephan pangjarphit toilo, tomon mongve along nephan pharlep pharlo lo.

²³Ne chini nang nephan kethi anatsi neponlo, abangphutin keplang nangji akopai anat.

²⁴Inut kevir amonit aphan nang kopisi tengkheng loma, ne kangjinso kechohang pen apar thang klem thekthe?

²⁵Kesung arat atum along ne chinidunde langma lapen keboi atum along ne ning dono dundelangma?

²⁶Ne kerengme lapen kethe-ang si ningthelo, bonta la alar kesung lapen kangtingsi vang-lo.

²⁷Keningri lapen kesosi nephlak dak-lo, arnivang ta ne kesung chechak nang-lo.

²⁸Ne mahang ikkui si damlo, atur ave pin pen; ne rat angno arjapsi kerap chohang-lo.

²⁹Hijai mate ostrik avo kehang ason nese helo-i lo.

³⁰Nereng ikkui lo; keso nebang prung-dop lo.

³¹Ihut isi ne ning-arong alunsi arjulong-lo, nonke kechiru-kehang arkisi ne arjulong-lo.