Read Karbi JOB 31 Bible Online

JOB 31 - Karbi bible

JOB 31

¹Nimsopimar aphan ok amek pen langlelo pusi ne semetang-lo.

²Jakongkethenei Arnam ephan kopisi keklempo? Monit akam keklem-heihei alar la kosonsi huipo?

³La kechokche keklem atum aphan kevir lapen keru vanlo.

⁴Ne keklem asontin Arnam thekpet; ne kengkamtin kechejor la thekpet.

⁵Ne kehingno akam klemklelo pu lapen bang kaprek aphan pachobaibelo pu semetang-lo.

⁶Athikpet alin pen Arnam nephan nepalin nang, lapen la thek-long po, nedai ave.

⁷Ne jongsi keme atovar pen suilote, mate kehingno anat hung-lote neri-heihei pap aphik chebonprung lote,

⁸ne saiketiki amo an pavirdet nang, mate ne ke-e amar bang pachodetnang.

⁹Ne jongsi nedung nerei apiso aphan ninghang-lote, lapen inghap angtan bangpi aphan chonghongjoi lote,

¹⁰nepiso bang kaprek a-an patum padang nang lapen akaprek apinso ahongplang along pabebe dun nang.

¹¹Lason kehingno ke kepathi pensi aduk pinangji.

¹²Lake isi akevir, chom ame asonpo, nekedo-an ta me cho-et po.

¹³Neban inut abang nephan pine aning kedokde alam paklang lote ne arjudun si klem pame lo.

¹⁴Lason ne klemklete, ne kopusonsi Arnam aphan cheklang poma? Nephan Arnam kangsaiji kevang ahut ne kopisi kethak dunthek poma?

¹⁵Inutpet nephan kethip a-Arnam si neban aphanta thip lo.

¹⁶Keduk aphan ne kaita kerapji momelo; hemepi aphan ta paningri longle det-lo.

¹⁷Mate nekechobom ahut jangreng atum pangchir longle det-lo.

¹⁸Nekai dottik an halatum aphan ne oralo.

¹⁹Mane jongsi pe-ri kenangji aphan dukthupik pulote

²⁰nebiresak pen kelong a-ul pen keselam ape ne laphan pilo. Anke la aning aklong pen nephan ropo.

²¹Kangsai adim kehai longji aphan ne jangreng aphan chobai det pulote

²²ne ri pangjui long nang, nephang pen lahei pamit long-nang.

²³Pima ne Arnam aduk kepi pherelo, lason akam ne kaita klemthekthe.

²⁴Keplang atum aphan ne kaita chekike

²⁵mate nekhi aphan chepindakde.

²⁶Ketur bong arni aphan ne kaita archoche mate keklarbong akelangme achiklo aphan seta.

²⁷Lahei aphan man kepiji pura nephan nepajapon longle, lahei aphan man kepiji neri chingjupje.

²⁸Lason apap ke kepathi pensi aduk pi nangji; la jakongkethenei Arnam aphan kroimolo.

²⁹Nehotur atum sang-lote nening cheparong thekthe, mate latum kevir ahut nening ingsamse.

³⁰Latum aphan thinon pu akardom pi pen ajok ne pap klemkle.

³¹Nephan kam ne keklempi kedo-an atum chini ne kechinine abang phan kaita dim pek-lo.

³²Dampri-dampro atum aphan nehem chevanlo lapen tovar bithe along amek pajang longle det-lo.

³³Akaprek atum halatum apap kechepatuji bor-i lo, bonta neke patute.

³⁴Rat-atum kopisi pujima ne pherere; latum pheresi ne dojoije lapen hem arlo chinghum venve.

³⁵Ne keningje alam baduta arjuje ma? Ne semetang-lo athetinta ahok. Nehotur lam vansi nebok lote ne tok-etji lalote ne lahei thek-long-et po.

³⁶Lahei ne nephang chevek-ruiji lapen phutup ason nephu athak chekupji.

³⁷Ne keklem ason an Arnam aphan than et po, lapen la angno nephu pading jong po.

³⁸Ne ketiki alongle pen jongsi ne kechonghudet pulote, lapen la ahokpet ahemphu pen endet lo pulote,

³⁹hadak kethe asok ne chodet-lo bonta la keklem atum aphan pangchirlote

⁴⁰thengthe, sok tipli alar bap nonpelar-heihei asang pavang lo nang. Job alamthe kejut-lo.