Read Karbi JOB 33 Bible Online

JOB 33 - Karbi bible

JOB 33

¹Lasi, Job, non ne kepu alam an arju pame non.

²Nening kopisi kedoma ne la keningje jisi chesik-lo.

³Nelam an mesen lapen ne ahoksi ningjeji.

⁴Arnam akarjongsi nephan pinchong-lo lapen nephan chethe nepilo.

⁵Nang unte nangthak dunnon. Nang lamthama chesik non.

⁶Nang lapen neta Arnam angno isinat-lo, etum banghini aphanta inghan pensi epinchong-lo.

⁷Lasi nang nephan kephereji thangnat ason ave; ne nangphan nanghai un-e.

⁸Non lahei si nang kepu ne arjulong-lo.

⁹“Ne dai ave; ne keklem thangta let-le. Ne nedo ave lapen pap pen jok-lo.

¹⁰Bonta nephan ketengkhengjisi Arnam nelong nedai rilo lapen nephan ahotur asonsi chekamlo.

¹¹Nekeng ingchin ani pen la nekok-lo, nekedam aling la nanglangdun krilo.”

¹²Bonta ne nangthan-lang, Job, nang chokchelo. Arnam ke badu amonit aphanta themu lang.

¹³Inut amonit aningkedok de alam kethakthu apot nang kopisi Arnam aphan kebok lo?

¹⁴Arnam puthot seta, baduta anochevarve det lo, la kepu alam aputhak.

¹⁵Ajo monit atum amek kejang ahut, Arnam mangpen lapen mek-rengjeng akethek-long pen ningje lo.

¹⁶La kepu alam halatum parjulo, lapen la pacheretoi alam latum pherelo.

¹⁷Latum pap keklem kepangtonji aphan lapen kechepindak pen latum aphan kepajokji aphan Arnam ningjelo.

¹⁸La latum aphan pavirtoite; kethi pen latum aphan la pajok lo.

¹⁹Keso lapen abang keso pachechak nangketoi pen ajok inut amonit aphan Arnam pakeng-lo.

²⁰Keso abang ingchirche detji kechome ason seta aphu partingrongpo.

²¹La abang chungkreng pajoiji; abang areppi saide thek-longji.

²²La chom leji dok-dok-lo.

²³Pherangke vangsi rap tahai, suri apherangke angbong inutbak, la monit aphan adeng than po.

²⁴Pherangke abang jinso pupo, “Laphan pajok non! La chom dam nangnelo. Laphan kepajokji anam dak dolo”

²⁵La abang riso hek po lapen ingtangthupo.

²⁶La ardom lote, Arnam thakpo; Arnam aphan ning arong pen archo po; la akam an Arnam pamethusen po.

²⁷Rat angno la ningje po, “Ne pap klemtang-lo. Ne kechehok akam klemkle det-lo, bonta Arnam nepajok lo.

²⁸La nephan chom kedamji pen khang-lo; lapen ne non anta renglang.”

²⁹Arnam lason klem lethot lethot-lo;

³⁰Inut akai la pajok-lo, lapen laphan ning arong pen padolong-lo.

³¹Non, Job, ne kepubom alam arjutha; dojoira nephan paningje longtha.

³²Bonta nang jongsi pine keningjeji do pulote la ne arjuji; nang chokpet-lo pu ne chehok pen nangkroidunji.

³³Bonta kali pulote, dojoi ra ne arjutha, lapen kosonsi reset nangjima ne nangthan po.