Read Karbi JOB 34 Bible Online

JOB 34 - Karbi bible

JOB 34

¹Monit nangtum pu an akethek pu-an akere,

²ne kepu alam ne arjutha.

³Nangtum chomat lote kechome amar chini, bonta kere alam karjulong ahut ke lapuson kali.

⁴La etumsi lam phar nangpo.

⁵Job pulo la adai ave, Arnamsi laphan ahok pen ingsaipipe pusi chepu.

⁶La arjulo, “Ne kopusonsi pachobai po lapen ne chokche pu chepupo? Ne kesoduk-khrup lo, bonta nepap ave.”

⁷Nangtum lason amonit Job ason konat ne thek-long loma? La kaita Arnam aphan manpipe.

⁸La kehingno amonit asong aningdok lo, lapen papi atum pen dam rappet-lo.

⁹La pulo, Arnam aningkehang keklem kebor-i ke thang akeme vanve.

¹⁰Nangtum karjuthek atum nelam arjutha! Kopima kechokche ason jakongkethenei Arnam klemjima?

¹¹Rat-atum kopi klem loma lasi la nong-e pichot, lapen latum a-ot ateng la klemlo.

¹²Jakongkethenei Arnam kehingnoke klemkle la badu aphanta ahok-he akangsai klemkle.

¹³Mane pentong Arnam ajakong kelong ma? mane tong laphan pirthe ahemphu kebatma?

¹⁴Arnam jongsi chethe pondet lote,

¹⁵kereng et atum an thisi longle aduk cheplangthupo.

¹⁶Nangjongsi reset pulote, ne lam arjutha.

¹⁷Dhoromi Arnam aphan nang khinde jilang ma? La ahok akangsai aphan hijim putong nang matha ma?

¹⁸Arnam Recho lapen kepangri atum aphan ningdokde det lo, jongsi latum amovangve lapen hingno lote.

¹⁹La kepangri atum abe dunde mate keplang abe dunsi keduk abe thurthe, pima la abangphutin aphan pinchong-lo.

²⁰Inut amonit ajo menmen amat thilot tahai. Monit aphan Arnam arbubopsi latum virlo; la jakongkethe aphan jakong chitirte pin pen pathilo.

²¹Monit akengkamtin la lang charilo.

²²Inut apapi Arnam pen chepatuji aphan dorphlup akangting ave.

²³Monit atum damsi laphan la kangsaiji aphan kedam nangji Arnam isi apor thik nangne.

²⁴Jalin atum aphan keterek lapen latum alar akaprek kebiji aphan la hut-he pin ta un.

²⁵Pima latum kopi klemloma la chini ajo angbong latum aphan la pasunlo, lapen berlamlo.

²⁶Kadokave la kethek-long adim aduk pilo,

²⁷pima laphan latum aphi kedun ington kok lo, lapen la ahukum an anochedende lo.

²⁸Latum keduk aphan Arnam angno pahang bor-i toilo, lapen halatum kerap kechohang la arjulo.

²⁹Arnam jongsi thangta klemkle pu matha lote, baduta laphan din un-e. La jongsi amahang chepatujoi lote monit atum kerap longle lo.

³⁰Arnam kave kechenek ot atum latum aphuthak kepangritoi adet thangnat ta klem un-e.

³¹Job, nangpap-heihei Arnam aphan chekobir loma, lapen pap klemklelo pu chechak loma?

³²Nang kelet nangpaklangtoi ji aphan Arnam pen chohang loma, lapen kehingno klemklelo pu chedon dun loma?

³³Arnam keklem akam nang kehili dun apot nangning kehang aling la keklemji nangning chethe ma? Nangsi phar nangpo, ne kali; nang kematha kopima nethan non.

³⁴Kemathathek abang nangchedon dunji; nelam karju kereset abang pupo.

³⁵Job ke kechinine pusi pulo, lapen la kepu alam an athe avepin.

³⁶Job kepu alam mathathu pame lote, nangta thek-long po, la keningje an kehingno amonit alam ason.

³⁷La apap along, la abe chethelo; eli kedo-an angno la Arnam aphan pinremlo.