Read Karbi JOB 37 Bible Online

JOB 37 - Karbi bible

JOB 37

¹Tomon herai nechethe kevang paprap-lo,

²Arnam ase nangtum do anta arjutha, lapen angho pen kevang acheter.

³La sining soding sining arve toilo, pirthe kejut pen pirthe ahin akaprek anat.

⁴Anke la kehang ase arju longpo, kemanghumeme acheter arki, lapen malomso do-an sining ame tur-ang-lo.

⁵Arnam ahukum pen manghumeme pleng-lo. Kechini un-e pin kemanghu meme ason.

⁶La pirthe athak ar-e kelok athan paklojisi hukum pilo, lapen langkepasun arve nangtoilo.

⁷La monit akam pangton lo. La kopi klem un ma latum aphan paklang-lo.

⁸Ingnam api atum angthor chedamlo.

⁹Tomon arve nitur ahin pen vang-lo, lapen so ardengtet akangsam nirep pen vang-lo.

¹⁰Arnam achethe kevang lang pangkleng-lo, lapen lahei ar-e athan pinchong-lo.

¹¹Sining kebirlak atur inghun ponlo,

¹²latum Arnam aning kehang pen damlo. Lahei Arnam ahukum pensi klemlo, pirthe adang bithe-bitha ta.

¹³Pirthe lang pachamjisi Arnam arve nangtoilo; monit aphan aduk kepiji ta la nangtoi tahai, lapen latum aphan kekroidun pu paklang thek.

¹⁴Malomso dojoi tha, Job, lapen arjutha; Arnam keklem manghumeme ason mathaduntha.

¹⁵Arnam kosonsi hukum piloma nang chinima lapen inghun pen pen kosonsi sining ame patur loma?

¹⁶Arnam kemanghumeme akam ason, kosonsi inghun sining angsong inglang loma nang chini ma?

¹⁷Kali, nitur atomon chenek longle. Kejap ahutsi nang kephang ok chechak thek chotji.

¹⁸Arnam sining kesang nang rap dun thek ma lapen la kangtang kenaibot amar nang pinchong thekma?

¹⁹Arnam aphan kopi punangjima nethan non; netum aning thangta ave, netum kepuji thangnat ason ave.

²⁰Ne Arnam pen chingki kelo, nepavirtoi aphan kopisi ne asai pi jilangma?

²¹Non sining akethe-ang turdang-lo, la kelengji klarthu-ang chot-lo; tomon kejap pen ajok sining sei-et-lo.

²²Nirep anat ser arong atur ephan paplengsetsi paphere lo.

²³Arnam ajakong lapu-an kethe eli la adung kedamji sang-rang. La dhoromi lapen ahokpet pen si monit pen klemlo.

²⁴Manghumemelo laphan abangphutin ta kephere pen si alang ingno arjap-lo lapen kere pu kechepu atum aphan la langle.