Read Karbi JOB 38 Bible Online

JOB 38 - Karbi bible

JOB 38

¹Sining kangder arki angbong pen Job aphan HEMPHU pulo.

²Nang chini ma, keledamdepin alam pen Nebidi alam karju abang nang komat-lo?

³Pinso ason arjap non, lapen Ne nang karju alam Nethaknon.

⁴Ne pirthe kepinchong ahut nang doma? Nangjongsi thek-o pulote laso alam nethantha.

⁵La ko-an the nangji ma konatsi pharlo? Laso aputhak komatsi kepun abarlon kesang-lo? La kedo-an nangthak thekjima?

⁶Pirthe aphan karchak archok kopisi archak loma? Pirthe archok komatsi ke-e loma?

⁷Adapprang halaso arni chiklolongso atum lun rappet-lo, lapen aning-arongsi sining arat atum hangjo lo.

⁸Talo kepasangthip anghap komatsi kangkirlo, pirthe apok pen komantusi la ingbob lo?

⁹La Ne si inghun pen talo dip-lo lapen kangting pen perhet-lo.

¹⁰Talo ahoi nesi bilo, lapen la kethit-het anghap-heihei aningsi bilo.

¹¹Nesi la putang-lo, “La anlo anpar damnangne. Ladak nang jakongkethenei adihu ington nangpo.”

¹²Job, nangkai isi angbong nang arnisi bak kepathe-ang-toi ahukum piloma?

¹³Kethe-ang, pirthe aphan pakomchen loma lapen kehingno atum kechepatu adim-heihei kehijukji ahukum nang piloma?

¹⁴Anerlo si inglong lapen arlok-heihei aphan pe kedu ason thakthak parjap-lo, longle amar aputhak ketok amang ason klangdak.

¹⁵Kehingno atum aphan anerlo atur the-ang-ong-lo lapen kephangno akam pen pahelo lo.

¹⁶Talo aklong alangjeng-heihei along nang damloma? Talopi achetai nang damloma?

¹⁷Chom akangtang anghap-heihei keton adim mane nangphan nangpaklang loma?

¹⁸Adang ko-an thema nang chinima? Nangchini te nethan non.

¹⁹Kethe-ang konat pensi kevang ma nangchini ma? Mate kangting atiri kopi?

²⁰Ko-an dam nangjima latum aphan nang than damthek ma, mate latum aphan pachevoi thekjima?

²¹Ne chini nang unji, pima nang sar-o lo lapen pirthe kethip ahut ta nang dolo!

²²Ne ar-e athan lapen herai athan kebi apuru angdeng-heihei adim nang damlong-loma?

²³Lahei kesung apor aphan lapen ron arni aphansi Ne bilo.

²⁴Arni kevang adim, mate nihang atomon kevang adim damlong loma?

²⁵Arve kedungji aphan komatsi kurdong hut-lo lapen cheter aphan tovar komatsi soi pilo?

²⁶Baduta kedode pin adim komatsi arve pajang-lo?

²⁷Kekrengtai lapen kang-it alongle along bap kepavangji aphan komatsi lang pachamlo?

²⁸Arve lapen ar-e atum apo doma?

²⁹Herai lapen lang angkleng apei komat lo,

³⁰komatsi lang angkleng pacheplang-lo, lapen talo athak pangkleng lo?

³¹Nang vosokpi kok thek ma lapen hingchong ari phlokthek ma?

³²Botor ahut nang chiklolongso-heihei aphan ja thek ma? Thokvam api lapen aso aphan japonthekjima?

³³Sining kepangri ason-heihei nang chini ma, lapen la, pen pirthe pangri thekjima?

³⁴Nang inghun aphan hukum pisi latum nangphan arve pajang jima?

³⁵Nang sining ame aphan hukum pi pen la vangsi “Nangkam aphanlo” pujima?

³⁶Nil aroi langthepi vangji pu Ibis avo aphan komatsi thanlo, mate arve jangji pu voloki aphan komatsi thanlo?

³⁷Komat inghun kelakha thek abang do, lapen lahei aphan arve kepajang ji aphan pangvui loma?

³⁸Ansi longle aduk inghun cheplangpo?

³⁹Hingho kepachoji aphan nang an ri pi thekjima, lapen kangchir hinghoso atum aphan pangkrang thekjima,

⁴⁰latum angthor kechedo ahut mate latum angthor along kechonghongding ahut?

⁴¹Kangchir an kechori dam ahut vo-akpi aphan lapen halatum asomar kecholongji aphan nephan an nehang lote, komatsi la pacholongpo?