Read Karbi JOB 41 Bible Online

JOB 41 - Karbi bible

JOB 41

¹Leviathan api aphan ok arhi pen nang nep thekjima mate la ade arri pen ingnang unji ma?

²Ari pen nang la anokan kroithekji ma, mate arhi pen akecheng pavur thekjima?

³La kedam longji aphan nang choningriji ma? Kangjinso kelongji aphan la nang choningriji ma?

⁴La nanglam kroisi kaiketa nangphan ingdukverji pu chechakji ma?

⁵Kepangreng avo ason laphan nang angsong rak dong pen nanghem kamklembang atum aphan pangneksoi thekji ma?

⁶La aputhak ok kejor atum ador petjima? Beha keklem atum la ingthansi a-ok jorji ma?

⁷La areng ok-kejor achir-heihei pen mate la aphu tok-phrok pen toklut unji ma?

⁸Laphan ephong paphotha, lapen nang la puthot bor-i-e-det po; Laso aron nang kaita tengne-nedet po!

⁹Leviathan aphan kethek-long abang angthin the haihe detpo lapen longle athak klibub po.

¹⁰Laphan aning pathi lote, laphan pherememe lo; la angno baduta arjap haihelo.

¹¹Komatsi laphan tengkhengsi chepajok thek po? Pirthe athak baduta la klem un-e.

¹²Leviathan akeng alam Ne nangthan lang lapen la ko-an kethe lapen ingtang loma nangthan po.

¹³La athak achoi baduta ingsek un-e, mate la kechingthang arisim baduta tok-plut un-e.

¹⁴Komatsi la angho pangkotoi thekpo? La kepherememe aso arlong ason ingtang-lo.

¹⁵La anung chong-heihei parensi selam lo, pacherap-plangsi arlong ason ingtang-lo.

¹⁶Asitin ta adun pen cherap-het angbong adak tomon lut un-e.

¹⁷Latum kedo-an ta cherap-kling amat baduta lahei vungjok un-e.

¹⁸La pase-er lote atur turphlak ti ti, lapen la amek arni kevang ason si atur tur lo.

¹⁹La angho pen amede thurlo lapen me achet kechingdat alangjeng nanglilo.

²⁰La anokan pen mehi nangbarlo, phule arlo bap kethor amehi nangkebar ason nangbarlo.

²¹La achethe kevang me akri pakarlo; la angho pen mede nangchonlo.

²²La achethok pu-an ajakong thelo la kechetong an atum aphan pherelo.

²³La areng kangduknur adim ave, kepanghang un-e angchin ason ingtang lo.

²⁴La arlong aning kephere ave, him kekoi a-arlong ason kangtang.

²⁵La thur lote kangtangnei atum seta pherelo; pheresi latum chepachong athai avelo.

²⁶Lapen amek kepadoji anokjir nahokta ave; laphan kepasodakji achir, athai-aso, mate achirso ave lang.

²⁷Ingchin laphan ke sok anar lo, lapen ingchin ke-er laphan kethupo athengpi ason ingduk lo.

²⁸Laphan kepakatji athai-aso avelang, arlong pen laphan kevar ke sok anar ajeng asonlo.

²⁹Chir laphan sok anar abeng-lo, monit atum laphan chir-heihei kejor la ingnek-choilo.

³⁰Apok athak alip-heihei kereset aphule achet asonlo; Sok kesi-i ajohton asonsi lahei longle inghan phlak lo.

³¹Keparklok alang asonsi la talo parklok lo, lapen phule ajangthu angpip asonsi la pasuprop lo.

³²La aphi keturbong atovar o-tekang-lo, lapen talo angpip pasuprop lo.

³³La pen kepangbarji pirthe athak thangnat amar ta ave; lake kephere thekthepin api lo.

³⁴Ane kethenei api-heihei aphan la langplot lo; lake ingnam api kedo-an arecho lo.