Read Karbi JOB 5 Bible Online

JOB 5 - Karbi bible

JOB 5

¹Hangnon, Job, langnon mane jongsi nangthak tangte. Nang kepangnodamji apherangke inutbak doma?

²Kethi an nangmethang nangningkethe pen ningchepa-oi lake kelu abang-lo, amovangvepin akam keklemlo.

³Kethirlo nangnak akelu aphan ne thek-long-o-lo, bonta menmen amat halatum aputhak hirjuno ne hangpilo.

⁴Halatum asomar kaita jokvanve; kangsai along halatum aphan keraijisi karjapdun abang ave.

⁵Kelu asok an kangchir arat-atum chodetpo, ingsu ajo along kevang asok seta, lapen la akhi kelang-it arat atum amek-so dunpo.

⁶Longle along kehingno chingjokje, lapen longle pen ta kesung arong vangve.

⁷Kali! Monitsi amethang aphuthak kesung chevanlo, me akar pen achet angsong kangjar asonlo.

⁸Ne jongsi vang-lo pulote ne Arnam anat pangnopo lapen nelam laphan hodaipo.

⁹La akethe akam keklem ili chinidunde, lapen la manghumeme akam akejut ave.

¹⁰La longle athak arve paklolo, lapen hidi lang padolo.

¹¹Lapen Arnamsi chepabihek atum aphan rung-lo lapen aning aduk kedo atum aphan aning-arong pilo.

¹²Keresak amonit atum, akemang la phangnolo, lapen kereset amonit aphan halatum akam along pachingnang-lo,

¹³lasi jat-le halatum klem seta chunchelo;

¹⁴Anerlo chitim seta latum kangting-kuk ason pherelo.

¹⁵Bonta Arnam keduk atum aphan kethi pen pajok-lo; Keboi atum aphan kechenek pen pajok-lo.

¹⁶Keduk aphan la aningkethe pilo lapen ajat kelangno aphan khang-lo.

¹⁷Arnam kepakeng amonit atum rengme! La kangchek ahut nangningthiri.

¹⁸La kepado amek Arnam perji; la aripen chok lapen ari pen pame.

¹⁹Kaita nangphan la kesungpen pajok-lo;

²⁰Akhim kethur ahut seta nangphan la pareng-long-lo, lapen ron ahut seta kethi pen pajok-lo.

²¹Arnam nangphan adet-langno pen pajokpo kevir vang-lote nangphan pajokpo.

²²Kephangno lapen kangchir aputhak nang ingnek choiji lapen ingnam api aphan pherere detji.

²³Nang ketiki ahidi arlong avedetji ingnam api nangphan kaita tengkhengkhelo.

²⁴Anke nang nangpehem along ingsamjinpen dolongpo; nang nang-biresak chelang seta lahei jokvanji.

²⁵Bap ajo bap amo asonsi nangsomar ongdunji.

²⁶Thengthe kemen apor an asonsi kesar ahut anta nangrengji.

²⁷Job, netum la ajirdingklui aloh kangchap pensi charli long-lo. La ahok, lasi la dengnon.