Read Karbi JOB 9 Bible Online

JOB 9 - Karbi bible

JOB 9

¹Kalang-lo, lahei ne aphrang pen arjulong-lo,

²Bonta inut amonit Arnam abekethur lam-kepho Koson si kehai unpo?

³Kosonsi baduta alang pen lam chedan poma? Baduta kethak thekthe akarju sonsuri la arjupo.

⁴Arnam ke lapu-an kere lapen Jakong kethe la abe baduta thur un-e.

⁵Pachererepin pen la inglongpi-heihei terek-lo, lapen aningthisi lahei la pavirlo.

⁶Arnam chikli toisi, Pirthe hijuk-lo; pirthe aphan karchak a-arlong paklemlo.

⁷Arni kevangpen la khang un lapen ajo chiklolongso paturte det ta un.

⁸Sining-heihei kesangjai akam along Alangliphan baduta rap dunde, mate talo a-okpi aphan amoi patekung pen aphi pachiruire.

⁹Sining angsong Arnamsi chiklolongso-heihei vek-lo hingchong patherang, vojarupi, vosokpi, sining anitur achiklolongso-heihei anta vek-lo.

¹⁰La keklem thedung akam ili chini dun un-e; lapen la manghumeme akam akejut ave.

¹¹Arnam helat bomlo, bonta laphan ne thek dunlongle.

¹²La aningkehang atengsi ponji, lapen laphan baduta khang un-e; baduta laphan arju hai abang ave, “Nangli kopisi keklemlo?” pu.

¹³Arnam aningkethe dover. La ahotur aphan berrop Rahab la talo a-okpi aphan kerap atum laphan ardomkhrup lo.

¹⁴Lasi Arnam aphan kethakji alamthe ne konatsi kelongpo?

¹⁵Nedai aveseta, ne klem unji ke nekangsai a-Bang Arnam pen kangjinso kechohang helo.

¹⁶La an seta, alang jongsi nephan lam paningje long lote, la nephan arjuji pu ne kroi un-e.

¹⁷La tomonpi nang toi si reng pasolo lapen athe avepin pen neparop-rulo.

¹⁸La nephan chethe pavang longle det lo; ne kai la kehopiksi paplengset-lo.

¹⁹Ne jakong thur bor-i nangjima? Arnam aphuthak jakong thur bor-i nangjima? Laphan ne kangsai hem pondet nangjima? Inut bak laphan padam un-ji ma?

²⁰Ne dai ave lapu ke kroithip abang, bonta nelam angtong adai kedo ason, lapen ne kaningje alamthe an nemethang aphuthak si chekhinde meme.

²¹Ne dai ave, bonta ne che-ot thipthe det-lo ne rengji ingtungte det-lo.

²²Jat ta ar-i-elo; dai doseta ave seta, ephan Arnam epavirpo.

²³Adai kave abang inut thilote Arnam ingnek lo.

²⁴Kehingno atum aphansi Arnam pirthe pidet lo. Kangsai atum an aphan la amek palu lo. Lapen la Arnam klemkle te komatsi keklem lo?

²⁵Ne arni-heihei kat bomlo, arnisi bak ta kemesen pu ave.

²⁶Nekai keprapnei atelong asonsi damlo, arum nampi aphiju aphan vomu kesok ason keprap.

²⁷Ne ingnek pen ne keso tengne bor-i-lote, ne kesung kechechak kedo-an nephan nang tong rip po;

²⁸Ne chini Arnam nephan adai do pu hok lo.

²⁹nephan nedai hok-lo apot, ne kopisi mathaver nangjilang?

³⁰Jat asabon seta nepap-heihei padam un-e-lo.

³¹Kesa-ur ahilik alongsi Arnam nephan nevarlo, lapen ne-pe neri nephan therak-rong-lo.

³²Arnam jongsi monit pulote, laphan ne thak thek si; netum kangsaihem damsi netum kechebohong alam pajut thekji.

³³Bonta netum angbong kangsai abang ave,

³⁴Nephan aduk kepi o-non, Arnam Nangning kepung bikok non!

³⁵Ne pherere. Ne ningje damji, pima nening alam ne chechini.