Read Karbi LUN 102 Bible Online

LUN 102 - Karbi bible

LUN 102

¹Ne kardom no chedentha O HEMPHU, lapen ne kerap kechohang arjutha!

²Ne kesung ahut ne pen suiri! Nephan no chedentha, Lapen ne kehang ahut nethak seraktha!

³Mehi asonsi nekai dambomlo, me kecho asonsi ne-ok soluk-lo;

⁴Kekrengtai abap asonsi nephan theng-ot-lo, an kechoji nening hanghedet-lo.

⁵Ne ase chepathesi ar-emlo; Ne thangnat kalisi kechungkreng ne reppi buiroilo.

⁶Ne kejejangtang ajo Anampi avo asonlo, hemban kedo avo-inghu asonlo.

⁷Ne tilaisi mekjang-lo, Ne kardong athak ejon avo asonlo.

⁸Arni kangthim ne hotur atum nephan nepinremlo; nephan ne chongthui atum ne men ensi ahirjuno hang-ilo.

⁹Nangning kethi lapen nangning kepung ajok thek-lo si ne an plang-lo. Lapen ne kejun alang penpen ne mekri alang chingvuikung-lo.

¹⁰Nang nephan nehumsi nevarchorlo.

¹¹Nekai achethe arnikangsam abin asonlo, ne ke kekrenghak abap asonlo.

¹²Bonta nang HEMPHU, kaike arecholo, a-ove kedo-an nang chemathalo.

¹³Nang thursi Zaion aputhak jinsolo, bangpi aphan kejinsoji apor nangletang-lo, non helo athik aporlo.

¹⁴Bangpi aphan pavirdet-lo seta, Nangban atum bangpi aphan inghonlo, bangpi aphan pavirdet-lo seta; lapen bangpi ru-et-lo seta; bangpi aphan latum jinsolo.

¹⁵Det atum HEMPHU aphan pherelo, la ajakong pirthe adang arecho an pherelo.

¹⁶HEMPHU puthot Zaion kechekimthu ahut, alangli ko-an thema paklangpo,

¹⁷alangli ke-otang arat, lapen halatum akardom alangli no chedenpo.

¹⁸HEMPHU kopisi klemtang-loma, aphi a-ove aphan tok-etnon; anke amahang kethekthelang arat atum anta laphan ro thekpo.

¹⁹Angsong kangthir-et adim pen, HEMPHU arum nanglang-lo, Alangli sining pen pirthe nanglang-lo.

²⁰Phatek kejang atum kar-em alangli arjulong-lo, lapen kethi nangji alam kedo aphan pajok-lo.

²¹Lasonsi la amen Zaion along pachethangpo, lapen laphan Jerusalem along ropo.

²²Det atum lapen rat atum vangpetsi HEMPHU aphan archopo.

²³Ne riso ahut HEMPHU nephan pa-ainihak-lo, alangli nekai pathihek-lo.

²⁴O Arnam, ne sarse ako nephan nepon-ritha; O HEMPHU nang kaike rengver.

²⁵Hako ahut nang pirthe thip-lo, nangri pen nang sining-heihei thip-lo.

²⁶Lahei avedetji, bonta nang doverji; lahei pe-ri ason ingrakji, pe-ri ason an lahei varchorji; lapen lahei avedetji.

²⁷Bonta nangke kaike prekpre, lapen nang chethe kejut ave.

²⁸Netum asomar jokvan pen dolongji, lapen nang kerai pen ajok latum aso-asu jokvanji.