Read Karbi LUN 103 Bible Online

LUN 103 - Karbi bible

LUN 103

¹HEMPHU aphan ronon, O ne karjong! Nening kedo-an la amen kangthir ronon!

²HEMPHU aphan ronon, O ne karjong, lapen Alangli akerap ale tengneri.

³Nepap kedo-an alangli diyalo, lapen ne keso an pamelo.

⁴Tipit pen alangli nephan pahelo-lo, kanghon, kangjinso pen nephan pahirjumelo.

⁵Akeme ason pen la nekai paplengset-lo, lasi ne vomu ason risover, lapen ingtangrakverlo.

⁶Kechenek kepho atum abe HEMPHU ingsai, lapen Israel arat aphan la thedung akam pathek-long-lo.

⁷Alangli akemang ason Moses aphan paklang-lo, lapen Israel arat aso atum Alangli kethedung akam pathek-longnang.

⁸HEMPHU ke jinsopik lapen inghonpik, aning kethi prap-pre, akanghon chemitme.

⁹Alangli ingchekverve, kaike aning thiverve,

¹⁰eli kephonangji a-ot ateng pen la aduk epiverve, mate etum epap-heihei lapen kechokche ateng alar huihe.

¹¹Pirthe athak inghun-asining kangtui asonsi, alangliphan man kepi abangphan la akanghon the-o.

¹²Nihang pen Nijang kehelo asonsi, elipap-heihei alangli eli pen pahelolo.

¹³Asomar aphan apo kechinghon asonsi, HEMPHU aphan man kepi abangphan inghonlo.

¹⁴Eli kopi pensi pinchong-loma alangli chini, eli longle adukchot pu alangli chini.

¹⁵Ephan ke, etum akai bap ason, nampi amir asonsi eli thelo lapen chanlo.

¹⁶Anke la aphuthak tomon jappo, lapen la pondetpo, baduta laphan thekthu longlelo.

¹⁷Bonta HEMPHU aphan man kepi abang ke la akanghon doverji, lapen alangli kechingkime a-ove ove anta doji.

¹⁸La Kechejok Aloh ateng ahokpet pen, lapen la ahukum-heihei kekroipame atum aphan doverji.

¹⁹HEMPHU anghoi siningsi chebilo, alangli ke kedo-an aphuthak arecholo.

²⁰HEMPHU aphan ronon, nang kangtang lapen ajakongkethe apherangke atum anta, la ahukum-heihei kekroi atum an, lapen alangli kepu aling kekroi atum an.

²¹HEMPHU aphan ronon, sining ajakong kedo-an atum, nangtum alangliban atum an, alangli ning-kehang keklem atum an.

²²HEMPHU aphan ronon, la kepinchong amar an, kedo-an adim-heihei alanglisi pangrilo, HEMPHU aphan ronon, O ne karjong!