Read Karbi LUN 104 Bible Online

LUN 104 - Karbi bible

LUN 104

¹HEMPHU aphan ronon O ne karjong! O HEMPHU ne-Arnam, nang ko-an kethe!

²Nang ahir-asang lapen nangdak-nangtur pensi plengset; kethe-ang pensi nangmethang chetelomlo.

³Pehem kesang asonsi sining-heihei nang sangjailo, lapen lang-heihei athak nang nanghem chekimlo. Inghun aphan nang ronhemkonglong ason rimlo. Lapen tomon arveng kedo-heihei athak ardonlo.

⁴Tomon-heihei aphan nang pherangke ason rimlo, lapen sining kebirlak nangban atum ason rimlo.

⁵Pirthe la aputa-heihei athak nang kebi pathirlo, lapen la kai seta terek un-e-detpo.

⁶Pe asonsi la athak talopi dipthip-lo, lapen lang inglongpi-heihei dip-lo.

⁷Nang lang-heihei aphan kangchek ahut, latum kat-lo, Nang hukum kepi kehang ahut latum cherai serak-lo.

⁸Inglongpi-heihei lapen arlokpi-heihei athak latum lilo, halatum aphan nang keselampi adim lilo.

⁹Latum puthot pirthe kedothipthe-detji aphan, nang ahoi selampisi latum apar dam un-e-lo.

¹⁰Arlok-heihei along lang pangbop-pilo, lapen inglong-heihei adak langroi palilo.

¹¹Halatum marat api atum aphan lang pilo, nampi agadha atum hadak latum akangit chepangkrang-lo.

¹²Adung-arei thengpi arong-heihei along, votek-voso atum atar cheselamsi lun lunlo.

¹³Inghun-asining pen inglong-heihei athak, arve nang pajang-lo, lapen pirthe nanghirjume pen plengset-lo.

¹⁴Chainong aphan nang bap pachingjok-lo, lapen arong-heihei monit aphan parimlo; ansi la cho-arche ason pathepo,

¹⁵lapen aning keparongji aphan, drakha ahorlang palongpo, jit ajangthu pen la paklarpo; lapen him laphan jakong pipo.

¹⁶Lebanon a-Kedar athengpi dorphlup arve long-lo, la HEMPHU amethang ke-e athengpi.

¹⁷Hadak votek-voso atar chepatarlo, fir athengpi along vochokang atar chepatarlo.

¹⁸Inglongpi-heihei kangtui ajo karju dolo, lapen arlong ajo koni api chepachong-lo.

¹⁹Achiklo-heihei kepangthek aphan, nang chiklo longpi pinchong-lo, arnita kechi apor chechinilo.

²⁰Nang ajo pinchong lapen ajo kangtingkuk ahut, kadokave nampi api nangbarlo.

²¹Hingho aloso atum kechonepji ahut latum ingrong-lo, Arnam kebipi a-an chorilo.

²²Arni klang-lote latum angthor chedamsi sang dampo.

²³Anke monit atum akam kecheklemjisi barpo, lapen arnikangsam an klempo.

²⁴HEMPHU nang pu-an ongdung amar pinchong-lo! Lahei kedo-an nang bidi pen pinchong-lo! Pirthe nang kepinchong amar pensi plengset.

²⁵Talopi dolo, thedung lapen ajam the-o, hadak lakha un-e-pin api dolo, thedung lapen aso anta dolo.

²⁶La athak telongpi vek-lo, lapen la arlo Leviathan juilo, la nang kepinchong talo apilo.

²⁷Latum akenang ahut a-an kelongji aphan latum kedo-an nangphansi chikilo.

²⁸Latum aphan nang pilo, lapen latum cholo, Nang latum aphan an pisi latum ingkrang-lo.

²⁹Nang sui lote latum pherelo, nang chethe cheponlote, latum thilo; lapen keplang-i alongle aduk anat chevoithulo.

³⁰Bonta nang latum aphan chethe pilote, latum plang-lo; pirthe aphan nang chethe kemi pilo.

³¹HEMPHU adak-atur kaike padovernang! Alangli kepinchong amar penle HEMPHU pachehoknang!

³²Alangli pirthe anat lang-lo, lapen la klemhurlo, alangli inglongpi-heihei ot-lo, lapen latum mehi sumonlo.

³³Nekai arjon ne HEMPHU aphan lunji, ne rengtik an ne Arnam aphan ne kero alun lunji.

³⁴Alangli nelun aning padoknang, pima ne kechehok alangli pensi vang-lo.

³⁵Pirthe along papi atum an pavir-etnang, kehingno atum pavedetnang. HEMPHU aphan ronon, O ne karjong! HEMPHU aphan ronon!