Read Karbi LUN 105 Bible Online

LUN 105 - Karbi bible

LUN 105

¹HEMPHU aphan kero pinon, Alangliphan pachethangnon, la kopi klemtang-loma det atum aphan thannon.

²HEMPHU aphan kero alun lunnon, la manghumeme akam keklemtang alam thannon.

³Eli alangli rideng kedo apot chehoknon, alangliphan karcho atum an ning cheparongnon.

⁴Kerap kelongjile HEMPHU aphan lapen ajakong rinon; lapen La akemang kaike rivernon.

⁵Nang Abraham aso-asu atum, alangli kangvaitang Jakob asomar atum.

⁶Arnam keklem manghumeme akam, lapen la akangsai-heihei chemathatha.

⁷HEMPHU si e-Arnam; alangli hukum-heihei ke pirthe adang an aphanlo.

⁸La kechechak aloh ateng kaike klemverpo, la suri isi a-ove aphan chechak-lo.

⁹Abraham aphan kechak ason, lapen Isaak aphan kechak anta alangli klempo.

¹⁰Jakob pen HEMPHU Kechejok Aloh chepathik-lo, la kaike doverpo.

¹¹“Kanaan adet nangphan Ne nangpidet-po,” alangli pulo, “La amethang chepa HEMPHU longpo.”

¹²Arnam arat aphai ong-e ahut, Kanaan adet along kechinine amonit ason plang-lo.

¹³Adet adet latum damlo, isi arat pen akaprek arat.

¹⁴Bonta baduta latum aphan Arnam pachenek longledet-lo. Latum aphan keraijisi alangli recho atum aphan papherelo.

¹⁵“Ne kangvaitang neban atum aphan paphori; Ne montri atum aphan ot-ri.”

¹⁶Halatum adet HEMPHU akhim toilo, lapen halatum kedo-an ason pon-et-lo.

¹⁷Bonta latum aphrang la inut amonit toilo, Joseph, kejordet aban asonlo,

¹⁸La akeng ingchin arri pen ingnanghet, lapen ingchin arri pen achethok kok-het-lo.

¹⁹La kepu alam chekok ketik an, HEMPHU alam laphan ahok-lo pu angthek pilo.

²⁰Ansi Ijip arecho laphan lophlot-lo, lapen det-heihei pangribang laphan pajok-lo.

²¹La laphan adet amei a-HEMPHU bat-lo, lapen laphan det kedo-an pangribang bat-lo.

²²Recho aban atum aphuthak ajakong dolo, lapen alangliphan kepare atum aphan kepinkhatji ajakong dolo.

²³Ansi Jakob ha Ijip anat damlo, lapen halabangso adet doklung-lo.

²⁴Arat aso aphan HEMPHU ongdung asomar pilo, lapen ahotur an sose ajakong pilo.

²⁵Ijip asor alangli rat aphan pahijim toilo, lapen la aban aphan pachobei-longtoilo.

²⁶Anke alangli ban Moses aphan alangli toilo, lapen alangli kangvaitang aban Aaron aphanta.

²⁷Arnam ajakongkethe akam-heihei latum klemlo, lapen Ijip adet along manghumeme akam klemlo.

²⁸Det adang kangting Arnam toilo, tebonseta Ijip asor alangli hukum kroikrelo .

²⁹Halatum alangroi-heihei alangli vi paplang-lo, lapen halatum alang a-ok pathijap-lo.

³⁰Halatum adet chongho-heihei si chonphrolo, lahei si rechohemta plengset-lo.

³¹Arnam hukum pisi tuhop, lapen rek-heihei det adang bithe umphlup-lo.

³²Alangli herai lapen sining ame, halatum adet aputhak arve alar nangtoilo.

³³Halatum adrakha lapen thebo arongta alangli pavirlo, lapen thengpi arong kedo-an ing-lok-lo.

³⁴Alangli hukum pisi longvur vang-lo, latum aphan lakha un-e.

³⁵Det adang han arong-heihei an latum cho-et-lo, sok kedo-anta latum cho-et-lo.

³⁶Ijip asor aso akleng kedo-an alangli pathilo.

³⁷Ansi alangli Israel aso aphan nangjalo, latum ser lapen rup cheponlo, lapen latum kedo-anta, a-ok mesen lapen ingtangrak saide.

³⁸Ijip asor latum aphan pherelo, lapen latum ke-o apot halatum chehok-lo.

³⁹Arat aphuthak Arnam inghun padip-lo, lapen kepathe-angjisi ajo me pilo.

⁴⁰Latum hang-lo, lapen alangli vo-ut-heihei pilo, latum aphan pangkrangjisi la sining pen an pilo.

⁴¹La arlong panghangsi lang pachonlo, langroi asonsi kejejangtang ajo lang lidung-lo.

⁴²Alangli ban Abraham aphan kechak alam chemathalo,

⁴³Lasi alangli kangvaitang arat aso aphan nangbarlinlo, lapen latum aning arong chepisi lun lunlo.

⁴⁴Alangli akaprek arat atum alongle, latum aphan pidet-lo. Lapen halatum ahidi-heihei latum aphan pa-entoilo.

⁴⁵Ansi alangli rat atum alangli Aron-heihei, lapen alangli ahukum-heihei kedo-an kroi unpo. HEMPHU aphan ronon!