Read Karbi LUN 106 Bible Online

LUN 106 - Karbi bible

LUN 106

¹HEMPHU aphan ronon! HEMPHU aphan keropinon, pima alangli mesen, Alangli akanghon kaike jutje.

²Alangli thedung keklemtang akam-heihei komat than unji? Komatsi alangliphan kero padorphlup unpo?

³Alangli hukum-heihei kekroi atum rengme, akeme klemver atum.

⁴HEMPHU nangrat aphan kerap ahut, nephanta chemathatha; halatum aphan kepajok ahut nephanta parloponnon.

⁵Nangrat atum kechingthur nepathek-longtha. Lapen nang khei aning arong, Lapen halatum nanglong kedo-an apot, Nephan pachepindak longtha.

⁶Nephusar atum keklem ason netum ta pap klemlo, netum kehingno akam klembomsi hingnolo.

⁷Ijip adet nephusar atum, Arnam kemanghumeme akam chinidun un-e-det-lo.

⁸Bonta alangli Kechejok Aloh ateng pen, latum aphan alangli pajok-lo, alangli halatum aphan ajakong kethe kepaklangji aphan.

⁹Talo-ke-er aphan alangli hukum pilo, lapen la krenghak-lo; kekrengphun alongle ajo alangli arat aphan japonlo.

¹⁰Latum aphan kehijim atum arideng pen alangli pajok-lo, latum ahotur pen alangli pajok-lo.

¹¹Bonta latum ahotur atum aphan, lang pajang-lo, inutbak reng-redet-lo.

¹²Ansi la arat atum la kechak alam kroilo, lapen laphan kero atum lunlo.

¹³Bonta alangli kopima keklemtang, latum chetengne dapsi lapen alangli kepare, chonghonghe si klemtap-lo.

¹⁴Kejejangtang ajo latum kecho-ar-i-pensi plengset-lo, lapen Arnam aphan asat lang-lo.

¹⁵Lasi latum kehang aling alangli pilo, bonta latum aphan kepherememe akeso nangtoilo.

¹⁶Kejejangtang ajo latum Moses aphan lang un-elo, lapen HEMPHU aban kangthir Aaron aphantalo.

¹⁷Ansi pirthe chingpudang-lo, lapen Dathan aphan joilut-lo. Lapen Abiram lapen ahem asor aphan pip-bup-lo.

¹⁸Halatum aphi kedun atum aphuthak me nangklosi, kehingno arat aphan me chodet-lo.

¹⁹Latum Sinai Anglong ser achainong aloso selamlo, lapen laso akumlin aphan archolo;

²⁰Latum Arnam adak-atur bap kechove akumlin pen lardet-lo.

²¹Ijip along alangli jakongkethe pen ajok, latum aphan Arnam kepajok-heihei tengne-et-lo.

²²Hadak alangli kopi kemanghumeme akam klemloma! Talo-ke-er alang kopi kemanghu akam klemloma!

²³Arat aso aphan Arnam pavir-etpo pu kepu ahut, la kangvaitang aban Moses si Arnam angno arjapthip-lo. Lapen alangli aningthisi latum kevirji pen khang-lo.

²⁴Anta latum det keme dengmolo, pima latum aphan akechechak kroikrelo.

²⁵Latum halatum apehem-heihei along chedosi pasimulo, lapen HEMPHU alam arjumolo.

²⁶Lasi kejejangtang ajo latum aphan, pathi-etji pusi alangli pacherelo,

²⁷lapen latum aso-asumar aphan, kekroikre atum angbong papratseisi, latum aphan bang adet along pathi-etji pu papherelo.

²⁸Pe-or along Arnam arat atum chetongpetsi Baal aphan archolo, lapen achethekave a-arnam-heihei aphan kethok athok-heihei cholo.

²⁹Latum akam-heihei pen HEMPHU aning papung-lo, lapen halatum angbong kepherememe akeso lutchok-lo.

³⁰Bonta Phinehas thursi adai kedo abangphan aduk pilo, lapen avur sakok-lo.

³¹Laso alam aphrang penta alangliphan chemathabomlo, lapen ha kevangji arni antalo.

³²Meribah alangmek-heihei along, rat atum HEMPHU aphan aning pathilo, halatum ajoine Moses sungnang-lo.

³³Latum aphan pu-an aning paholo, alangli mathathesi ningjebinlo.

³⁴HEMPHU latum aphan kepi ateng, latum kekroikre atum aphan pathilap-ledet-lo,

³⁵bonta halatum pen latum che-en chedolo, lapen halatum akekroitap atovar-heihei endunlo.

³⁶Arnam arat atum kumlin-heihei archolo, lapen la si halatum aphan pavirlo.

³⁷Kanaan akumlin-heihei aphan, latum asopo asopi athok thok-lo.

³⁸Latum halahei kadokave, asomar atum aphan pathisi, halahei apran karmut pen ajok longle pangthir-thedet-lo.

³⁹Latum akam pen ajok amethang chepangthir-thelo, lapen Arnam aphan kroithip-thedet-lo.

⁴⁰Lasi Arnam arat aphan aning thihak-lo, latum aphan alangli hijimlo.

⁴¹Kekroikre atum ajakong arideng latum aphan alangli obup-lo, lapen latum ahotur latum aphuthak pangrilo.

⁴²Latum aphan ahotur atum chenek-lo, lapen halatum aber donang pamelo.

⁴³Ongdung aphong HEMPHU arat aphan pajok-lo, bonta latum alangli be kethurjisi chongvailo, lapen pap arlo inglimchok-lo.

⁴⁴Tebonta latum kehangser ahut HEMPHU ano chedenlo. Lapen latum akesung alangli lang-lo.

⁴⁵Pima halatum ajoine alangli akechechak alam chemathalo, lapen alangli thedung akanghon ajok,

⁴⁶Latum aphan kechenek atum, alangli latum aphuthak aning padonolo.

⁴⁷Netum aphan pajoknon, O netum Arnam, HEMPHU, det-heihei pen netum aphan nevan-thudetnon, anke netum nangliphan nangrothekpo; lapen nanglimen kangthir aphan rolongpo.

⁴⁸HEMPHU aphan ronon!