Read Karbi LUN 107 Bible Online

LUN 107 - Karbi bible

LUN 107

¹“HEMPHU aphan kero pinon, pima alangli mesen; alangli kanghon kaike jutje!”

²Lahei alam HEMPHU aphan kero ahut pulemdetnon, nangtum kejok-long atum an.

³Alangli nang-hotur pen pajok-lo, lapen bang adet pen nangvandet-lo; nihang pen nijang, nirep pen nitur .

⁴Kejejangtang ajo ajehak atum tovar manghusi damtap-lo, lapen kedoji arongsopi kepaleji atovar longledet-lo.

⁵Latum ingchirlo, lapen lang ing-it-lo, lapen aning chepathethepinlo,

⁶anke sung-ongsi latum HEMPHU aphan hangserlo, lapen alangli latum akesung pen pajok-lo.

⁷Alangli latum aphan kekengset atovar, latum kedoji arongsopi atovar anat japonlo.

⁸HEMPHU kechemitmepin akanghon apot, latum alangliphan rovek nangji. Pima latum aphan alangli manghumeme akam klempitang-lo.

⁹Kangit atum aphan la pangkrang-lo, lapen kangchir atum aphan akeme ason pen papleng-lo.

¹⁰Ajehak atum ke kangtingrim lapen akangting ajosi do, phatek kedo atum ingchin pen kangnang akesung pholo.

¹¹Pima latum Jakongkethenei Arnam ahukum-heihei abe thurlo, lapen alangli kepinkhat-heihei dengmolo.

¹²Latum keduk akam apot pritthang-lo, latum klipo; lapen baduta kerapdun abang avelo.

¹³Anke latum kesung phosi HEMPHU aphan hangserlo, lapen alangli latum aphan kesung pen pajok-lo.

¹⁴Latum akangtingrim lapen akangting pen alangli pajok-lo.

¹⁵HEMPHU chemitmepin akanghon apot, latum alangliphan chorovek nangji, pima latum aphan alangli manghumeme akam klempitang-lo.

¹⁶Alangli tam-anghap-heihei ingdilo, lapen ingchin akindang an bengpet-lo.

¹⁷Ajehak atum chepalusi halatum apap-heihei pen lapen akehingno apot kesung chechak nang-lo;

¹⁸latum kecho ahormu thangta kechoji aninghanghe, lapen thiji dokdok-lo.

¹⁹Anke latum sungsi latum HEMPHU aphan hang-lo, lapen latum akesung pen alangli pajok-lo.

²⁰Alangli lam toisi halatum aphan pamelo, lapen kethinangji akevir pen halatum aphan pajok-lo.

²¹Alangli kechemitme akanghon apot, latum HEMPHU aphan rovek nangji, pima alangli latum aphan manghumeme akam klempitang-lo.

²²Athok-heihei pen latum alangliphan rovek nangji, lapen ning arong alun-heihei pen alangli keklemtang an than nangji.

²³Ajehak atum talopi athak telongpi-heihei pen veksi, talo-heihei along pen halatum chepareng-lo.

²⁴Talo athak alangli kemanghumeme akam-heihei HEMPHU kopi klem unma, latum thek-long-lo.

²⁵Alangli hukum pisi tomonpi kejap pangcheng-lo, lapen atarthui pathurlo.

²⁶Talopi-heihei aphan angsong rungtang-lo, lapen aklongsi panglimlo. Lason akepherememe along monit atum ning chethe haihelo.

²⁷Horkangri amonit atum ason, latum patikungsi krep-ring-rang-lo. Halatum abidi donak-lo.

²⁸Anke halatum sungsi HEMPHU aphan hang-lo, lapen alangli halatum aphan akesung pen pajok-lo.

²⁹Alangli tomon tipri pahamdet-lo, lapen lang adihu padojoilo.

³⁰Ingsamri apotsi halatum chehok-lo, lapen latum aningkehang kepaleji alongkam along alangli vanlo.

³¹HEMPHU kechemitme akanghon apot, latum alangliphan rovek nangji, pima latum aphan alangli manghumeme akam klempitang-lo.

³²Rat akechingrum along latum alangli nong pachethangvek nangji, lapen jalin atum amei angno alangliphan rovek nangji.

³³HEMPHU si alangroi-heihei pakrenghak-lo, kangbop alang-heihei paliledet-lo.

³⁴Aho-or kedo alongle ingti ajo pinchong-lo, pima hadak kedo atum kehingno ong apot.

³⁵Sangtimili ajo langbi, lapen kekreng alongle ajo, alangli lang pangbop-lo.

³⁶Hadak an kangchir arat atum alangli padolong-lo, lapen halatum kedoji aphan rongsopi kimlo.

³⁷Latum hidi-heihei rik-lo, lapen drakha arong-heihei elo, lapen athe chorot longpik-lo.

³⁸Alangli rat aphan pahirjumelo lapen latum asomar ongdung-lo, latum api ahur kechanche pen alangli khang-lo.

³⁹Kechenek-ot lapen kesung chechak nangsi, Arnam arat atum remdet lapen ketherak nang ahut,

⁴⁰latum aphan kechenek atum aphan Alangli hijimlo, lapen kejejangtang ajo tovar kave ajo padamtap-lo.

⁴¹Bonta keboi atum aphan halatum akeduk pen la pajok-lo, lapen pi ahur kechan asonsi halatum ahemtun pachanlo.

⁴²Dhoromi atum la thek-long-lo, lapen chehok-lo; bonta kehingno kedo-an aphan padoklip-lo.

⁴³Kereset atum lahei alam pamunthinang, latum HEMPHU akechemitme akanghon pachininang.