Read Karbi LUN 109 Bible Online

LUN 109 - Karbi bible

LUN 109

¹Ne nangliphan rolo Arnam, Nangli dojoirinon.

²Kehingno amonit atum, lapen kechobei atum nephan tengkheng-lo, latum nephuthak chobeilo.

³Lapen nephuthak kehingno alam ningjelo, athe avepin pen netengkheng-lo.

⁴Ne latum aphan inghon, lapen latum aphan ne ardom pilo seta, latum nephan khang-lo.

⁵Keme alar latum nephan kehingnosi huilo, lapen kanghon alar nehijimlo.

⁶Ajehak tangka kecho akangsai abang, nehotur aphan kangsaijile ingvainon, lapen la amethang ahotur angbong, inut laphan pabok lonang.

⁷Laphan pangsaira adai panep-longnang! La akardom pap pacheplang lonang!

⁸La achethe pajut dapprang lonang, la akam anut kaprek-le pa-enlonang!

⁹La asomar atum jangreng pamannang, lapen apiso paheme lonang!

¹⁰La asomar hem-rit kave kechorek atum paplang lonang, lapen ke-otang ahem latum kedo adim penta paphlung-et-lonang!

¹¹Laphan keparem abang la akhi kedo-an paponpi-et-lonang, lapen la keklemtang amo kechininepin atum pa-en-etnang.

¹²Laphan baduta panghonhenang, mate la ke-o ajangreng atum aphan palananenang.

¹³La aso-asu an pathilapnang, aphi a-ove la amen patengnelapnang.

¹⁴La aphusar atum akehingno HEMPHU palakhanang, lapen la apei apap-heihei padiyaje-detnang.

¹⁵Halatum apap-heihei kaike HEMPHU palakhavernang, bonta amethang ke pachetengnebup lonang.

¹⁶Halaso abang kaiketa kanghon alam mathathe, keduk-keboi lapen kerap kelongle atum aphan la pasungsi pathilo.

¹⁷Ahirjuno kehang la aning dokpik-lo, la ahirjuno paplangnang! La ahirjume kepuji hijimlo, Baduta laphan ahirjume papipedetnang!

¹⁸La kechingthang asonsi la ahirjuno hang-lo, lang ason laphan ahirjuno abang arlo, lapen arrepi arlo jangthu ason pajumsopnang!

¹⁹Latum laphan pe ason padipthip, lapen vamkok ason laphan pakompetnang!

²⁰Nephan lason kehingno alam keningje atum aphan, lasonsi HEMPHU nehotur aphan aduk pilo, lapen paremlo .

²¹Bonta ne HEMPHU HEMPHU, nang kechechak ateng nephan neraptha, lapen nepajoktha, pima nang inghon lapen chingkime-o.

²²Ne dukvok lapen boidet; nening aklongsi ne ning oipik.

²³Arnikangsam abin asonsi ne aveji dokdok-lo.

²⁴Kecholongle ajok ne kengphu ainiruilo, ne thang kalipinlo, nereng lapen nerrepi chonroilo.

²⁵Nerat atum nephan nethek-long-lote, latum nekepinremjisi latum aphu-heihei chehijuk-lo.

²⁶Neraptha, O ne-Arnam HEMPHU, nang kechemitme akanghon penle nepajoktha.

²⁷Nangsi nephan nepajok-lo pu, nehotur atum pachininang.

²⁸Latum nephan ahirjuno pitahai, bonta nang nepahirjumeji, lapen nang nephan pachehok longnang.

²⁹Nehotur atum kelang-remle padipthipnang; choi asonsi latum aketherak pachepindeng nang.

³⁰HEMPHU aphan ne asekethe akero piji, rat atum akechingrum along ne laphan choroji.

³¹Pima la keduk aphan chedanpilo, lapen laphan kepathiji kebok atum arideng pen pajok-lo.