Read Karbi LUN 115 Bible Online

LUN 115 - Karbi bible

LUN 115

¹Nangliphan chotji, O HEMPHU, nangliphan chotji, lapen netum aphan kali anong kepiji, pima nang kanghon chemitme, lapen kekroithirklong.

²Kopisi det atum ephan arjuma, “Nangtum Arnam konat-lo?”

³Netum Arnam ke ha sining; alangli ke aningkehang alingsi keklem.

⁴Halatum a-arnam ke rup lapen ser pensi keselam, monit ari pensi kethip.

⁵Latum angho do, bonta ningje thekthe, lapen amek-heihei do bonta checharche.

⁶Latum ano-heihei do, bonta arjulongle, anokan-heihei do, bonta ingnim thekthe.

⁷Ari-heihei do bonta klem-un-e, lapen akeng do, bonta dam thekthe; latum arki pado thekthe.

⁸Halahei keselam atum an, lapen lahei aphan kechiki atum an, halatum keselam akumlin ason paplangnang .

⁹HEMPHU aphan chikinon, Israel arat atum, alangli nangrap lapen nangrailo.

¹⁰HEMPHU aphan chikinon, nang Arnam akurusar atum, alangli nangrap lapen nangrailo.

¹¹HEMPHU aphan chikinon, laphan karcho atum an, alangli nangrap lapen nangrailo.

¹²HEMPHU echemathalo, lapen epahirjumepo; alangli Israel arat aphan lapen Arnam akurusar aphan pahirjumepo.

¹³Alangliphan man kepi abangphutin aphan Alangli pahirjumeji, kethe-keding lapen kebi-kethi aphantalo.

¹⁴Nangtum aphan HEMPHU osomar papinang, nangtum lapen nangso-nangsu do-an!

¹⁵Nangtum aphan HEMPHU nangpahirjume nang, Sining lapen pirthe kepinchong a-Bang.

¹⁶Sining HEMPHU si chepahemphu-chot, bonta pirthe ke Alangli amonit aphansi pidet-lo.

¹⁷Kethitang atum HEMPHU aphan ro thekthe, kedoklip adim kedam atumta ro thekthe.

¹⁸Bonta eli kereng atumsi, alangliphan keropiji, non lapen kaiketa. HEMPHU aphan ronon!