Read Karbi LUN 118 Bible Online

LUN 118 - Karbi bible

LUN 118

¹HEMPHU aphan kero pinon! Pima alangli mesen, Lapen alangli akanghon kaike dover.

²Israel arat papu nang, “Alangli akanghon kaike dover.”

³Arnam kurusar atum papunang, “Alangli akanghon kaike dover.”

⁴Alangliphan karcho atum an papunang, “Alangli akanghon kaike dover.”

⁵Ne kesung aning pen HEMPHU aphan hang-lo, alangli nephan thak-lo, lapen nepajok-lo.

⁶HEMPHU nelong do, ne phererelo, bang nephan kopisi ne-klem thekpoma?

⁷HEMPHU si nephan rap-lo, lapen ne hotur atum kerem ne thek-longji.

⁸Monit aphan kechiki apar, HEMPHU aphan kechiki memu.

⁹Monit ajalin aphan kechiki apar, HEMPHU aphan kechiki memu.

¹⁰Ongdung hotur atum nekompet; bonta HEMPHU ajakong pen; ne halatum aphan pavirlo!

¹¹Latum nephan nekompet-lo, bonta HEMPHU ajakong pen ne latum aphan pavirlo!

¹²Pijo asonsi latum nebor-prung-lo, bonta ingsu ajo me kechodap asonsi, latum aphan me cholo; HEMPHU ajakong pen ajok ne halatum aphan pavirlo.

¹³Nephan netengkheng-dutsi neparemdet-lo, bonta HEMPHU si nerap-lo.

¹⁴Nephan HEMPHU-si jakong pathelo, lapen pangtang-lo, alanglisi nerap-lo.

¹⁵Arnam arat apehem-heihei along, kehai aning arong akehang arjutha! “HEMPHU ajakong kethesi la klemtang-lo!

¹⁶Alangli ajakongsi ephan kehai vanlo, ron along alangli ajakong kethe pen.”

¹⁷Ne thithe bonta rengji, lapen HEMPHU kopisi klemtang-loma pachethangpo.

¹⁸Alangli nephan aduk pipik-lo, bonta nepathilot-ledet-lo.

¹⁹Kardomhemthepi anghap-heihei nephan ingputha; ne arlo lutsi HEMPHU aphan kero-heihei piji.

²⁰Lahelo HEMPHU anghap-lo; dhoromi atumsi arlo vang longchot-lo.

²¹Ne nangliphan rolo, HEMPHU, pima nangli no chedenlo. Pima nangli neliphan pahailo.

²²Ale kave pu ke-enmo a-arlongsi, kadokave angbong pen kenangsotnei cheplang-lo.

²³La HEMPHU klemtang-lo; la ko-an akemanghumeme!

²⁴HEMPHU kepinchong-heihei arni la helo, eli chehok-ra talon lonang!

²⁵Nepajoktha, HEMPHU; Nepajoktha, netum aphan nepachunlongtha, O HEMPHU!

²⁶HEMPHU amen pen kevang a-Bangphu aphan, Arnam pahirjumenang! HEMPHU a-Kardomhemthepi pen netum, Nang pahirjumelo.

²⁷HEMPHU Arnam, alangli ephan me-o-lo. Nangtum ari thengpi aro-heihei ot-ra, Rong-aje pangchengnon, Lapen dovan akung kongvaidirnon.

²⁸Nangli neli Arnamlo, lapen nangliphan ne kero pilo; nangli kethedung akam ne pachethangji.

²⁹HEMPHU aphan kero pinon, pima alangli mesen, lapen alangli akanghon kaike dover.