Read Karbi LUN 119 Bible Online

LUN 119 - Karbi bible

LUN 119

¹Kedinnang kavepin atum, lapen HEMPHU aron ateng pen kedo-kethak atum rengme.

²Alang hukum kekroipet, lapen alangphan aning aklong pen kekroi atum rengme.

³Latum kechokche klemkle, latum HEMPHU atovarsi dam,

⁴HEMPHU, nang netum aphan, nang aron-heihei pitang-lo, lapen halahei kekroithip thekji aphansi epulo.

⁵Nang kepinkhat-heihei, ne kekroithip thekji aphan, kosonsi ne ning chethepo!

⁶Nang hukum-heihei an neno chedenlote, anke nephan patherak-relo.

⁷Nang dhoromipet kangsai-heihei ne charlilo, kangthir-et aning pen ne nangphan choroji.

⁸Nang Aron-heihei ne kroipo; nephan ne-ori!

⁹Kopusonsi riso amonit akai chepangthir-et thekpo? Nang hukum-heihei kekroi pen ajok,

¹⁰Nening kedo-an pen ne nangphan kangdukji bor-i-lo, nang hukum-heihei kekroikre pen nepahelotha.

¹¹Nang Aron nening arlo chebilo, anke ne nang be-thursi pap klemklelo.

¹²Ne nangphan rolo, O HEMPHU; nang tova-r-heihei nethantha.

¹³Ne asepathesi ruithupo, nang kepi Aron kedo-an.

¹⁴Ongdung akhi kedo apar, nang hukum-heihei keklem ne ning cheparong-lo.

¹⁵Nang kepinkhat aron-heihei ne ingchap-lo, nang kethan-heihei ne langpamelo.

¹⁶Nang Aron-heihei alongsi ne ning chepangsamlo, nang hukum-heihei ne tengnenelo.

¹⁷Ne, nangban aphan akeme klemtha, anke ne rengsi nang kethan-heihei kroithekpo.

¹⁸Nemek ingputha, anke ne nang Aron-heihei along, kemanghumeme ahok ason-heihei ne thek-longpo.

¹⁹Ne ladak pirthe kedo ke malomso aphanchot, nang hukum-heihei ne pen paturi.

²⁰Kechingtung ongsi nening kesolo, kadokave apor ahut seta ne nang kangsai chini ingtung.

²¹Ane kethe atum aphan nang ingchek-lo, nang hukum-heihei kekroikre atum an ahirjuno palong nang.

²²Halatum akepinrem lapen akangton pen nepajoktha, pima ne nang Aron-heihei kroilo.

²³Kepangri atum chingrumsi nepathiji mang-lo, bonta neke nang kethan-heihei ingchapji.

²⁴Nang kepinkhat-heihei nening padok-lo, halahei nephan parebang atumlo.

²⁵Longle aduk ajo ne remdetsi tilailo, nang kechak ateng neparengthunon.

²⁶Ne keklemtang an ne chekobirlo, lapen nang nethak-lo, nang tovar-heihei le nethannon.

²⁷Nang Aron-heihei kechinijile nerapnon, lapen ne nang kemanghumeme akethan-heihei aputhak mathapo.

²⁸Ning keduk nephan nechodet-lo, nang kechak ateng nepangtangtha.

²⁹Kechokche atovar kedam pen nepahelotha, lapen nang kechingkime pen nang Aron nethantha.

³⁰Kekroijisi ne chongvailo, nang kangsai-heihei anat neno chedenlo.

³¹Nang kepinkhat-heihei ne kroilo, HEMPHU; nephan nepatherak-longri.

³²Neningkehang pen nang hukum-heihei ne kroipo, pima nang nephan kechini ajakong nepipo.

³³Nethantha, HEMPHU, nang Aron-heihei athe; lapen aling apor seta lahei ne kekroithekji aphan.

³⁴Nang Aron nephan than pachinitha, lapen ne la kroithekpo, la nening kedo-an ne chebipo.

³⁵Nang hukum-heihei kekroipame thekjile nebinon, pima lahei along si ne ning arong longchot.

³⁶Keplang-o aphan mute nang aron-heihei kekroithekjile, nephan nening pahangnon.

³⁷Ale kave ason nemek kelangledetjile nebinon, nang kechak ateng nephan keme akam klemtha.

³⁸Ne nangban aphan nang kechak ason chebitha, nangphan kekroi atum an aphan nang kechak ason.

³⁹Ne kephere akepinrem pen nepajoktha, nang kangsai-heihei ko-an kemanghumeme binong.

⁴⁰Nang hukum-heihei kekroiji aphan nening hang-o, nephan chethekemi pitha, athema neke dhoromipet.

⁴¹Nang nephan ko-an chinghonloma nepaklangtha, HEMPHU, lapen nang kechak ateng nepajoktha.

⁴²Anke nephan nekepinrem atum aphan ne thakdun unpo, pima ne nanglam aphan chikilo.

⁴³Kaike apor seta ahok alam keningjeji nepa-untha, pima ne nang kangsai-heihei along nening chethe.

⁴⁴Nang Aron kaike kroiverpo, kaike apor anta.

⁴⁵Ne kejokvan akai si doji, pima ne nang kethan-heihei kekroiji bor-i-lo.

⁴⁶Recho atum aphan nang hukum-heihei ne pachinipo, lapen ne therak-relo.

⁴⁷Nang hukum-heihei kekroi along nening arong-lo, pima ne lahei ningdok-o.

⁴⁸Nang hukum-heihei aphan ne aman pilo, lapen chinghonlo, nang kepinkhat-heihei aputhak ne munthilo.

⁴⁹Ne, nangban aphan nang kechak alam chematha damtha; la si nephan nening pathelo.

⁵⁰Kesung ahut seta nephan nening pangsamlo, pima nang kechechak ason alam nephan chethe pilo.

⁵¹Anekethe atum kaiketa nephan nepinremlo, bonta nang aron pen ne suise.

⁵²Hako ahut nang kangsai-heihei alam ne chemathadamlo, lapen lahei nephan ning pangsamlo, O HEMPHU.

⁵³Kehingno atum nang Aron kangdi ne thek-long-lote, ne ning kethi pensi plengset titi.

⁵⁴Ne pirthe akai thihek ahut seta, nang hukum-heihei aputhak ne lun-heihei tok-lo.

⁵⁵Ajo ne nangphansi ning chemathalo, O HEMPHU, lapen ne nang Aron aphan mathalo.

⁵⁶Nang hukum-heihei kekroi along ne ning arong long-lo.

⁵⁷Nening kehangji an nang helo, O HEMPHU; nang Aron-heihei kekroi ne chechak-lo,

⁵⁸Nang kechechak ateng nephuthak, kangjinsojisi ning kedo-an pen, ne nangphan choningrilo.

⁵⁹Nemethang a-ot ne chemathalo, lapen Alang kepinkhat-heihei keklemji ne chechak-lo.

⁶⁰Nang hukum-heihei paderdepin pen kekroiji paprappo.

⁶¹Kehingno abang nephan pham tot-lo, bonta ne nang Aron-heihei tengnenelo.

⁶²Nang dhoromi akangsai-heihei apot, jirlo thursi ne nang chorolo.

⁶³Ne ke nangphan kangduk atum an, lapen nang Aron-heihei kekroi atum an ajirpolo.

⁶⁴HEMPHU, pirthe ke nang kechemitme akanghon pensi plengset-lo, nang hukum-heihei nethantha.

⁶⁵Nang kechechak alam nang chebilo, HEMPHU; lapen ne, nangban aphan nangli mesen.

⁶⁶Nephan bidi lapen gian nepitha, pima nang hukum-heihei ne chikilo.

⁶⁷Nang nephan aduk nekepi aphrang ne damtap-lo, bonta non ne nanglam kroilo.

⁶⁸Nang ko-an kechingkime, ko-an kanghon! Nang hukum-heihei nethantha.

⁶⁹Anekethe atum nephuthak pachobeilo, bonta nening kedo-an pen ne nang kepinkhat-heihei kroilo.

⁷⁰Lahei amonit thang akechini ave, bonta nang Aron along nening ingsamlo.

⁷¹Nephan aduk kepi nephan mesenlo, pima la nang hukum-heihei nepacharlilo.

⁷²Nang nekepi Aron ke, pirthe suri-suri aser lapen arup kedo-an apar memulo.

⁷³Nangsi nephan pinchong-lo, lapen nepajokvanlo pu kechini ajakong nepitha, ansi nang Aron-heihei ne charlilongpo.

⁷⁴Nangphan man kepi atum, nephan thek-long-lote, latum chehokpo.

⁷⁵Ne chini nang akangsai-heihei dhoromipet, HEMPHU, Lapen nang nephan aduk pilo, pima nang kekroi thirklong.

⁷⁶Nang nangban aphan kechak ason, nang chemitme akanghon ning nepangsamlo.

⁷⁷Nephuthak ingjinsotha, lapen ne rengpo, pima nang Aron along ne ning ingsamlo.

⁷⁸Nephan anekethe atum nekeboktap apot patheraknang, nephan thulok-ke nang kepinkhat-heihei aputhak munthiji.

⁷⁹Nangphan man kepi atumle nelong pavangnang, nang hukum-heihei kechini atum an.

⁸⁰Nang hukum-heihei ne kekroithekpame abang paplang-lonang, lapen keremnang aketherak pen nepajokphlotnang.

⁸¹Nang nepajokji pu kechonghongtot ansi, ne ainihak-lo HEMPHU, nanglam alongsi ne chikilo.

⁸²Nang kechak aphan kechonghong-ong nemek so-ang-lo, neli charjulo, “Nang komantusi nephan nepajokpoma?”

⁸³Kevartang ahorlang a-ok-reng asonsi neta ale avelo, tebonta nang hukum-heihei ne tengnene.

⁸⁴Ko-an ajirkeding ne chonghong nangjilangma? Nephan kepasung atum aphan nang komantusi aduk kepijima?

⁸⁵Nang Aron kekroikre anekethe amonit atum nephan, hilik-heihei tuktang-lo.

⁸⁶Nang hukum an chikime, monit atum pachoreisi nephan pasung-lo, neraptha!

⁸⁷Nephan kepathiji aphan penang an akam chunlo, bonta nang hukum-heihei ne pangkreve-ve.

⁸⁸Pima nang kechemitme akanghon apot nephan akeme klemtha, ansi nang Aron-heihei ne kroithekpo.

⁸⁹Nang lam ke kaiketa doverji O HEMPHU, la sining angsong kaike thirkluksi dolo.

⁹⁰A-ove ove anta nang akekroi kethir doverpo, nang pirthe adim si bilo, lapen la doverlo.

⁹¹Pini anta kadokave amar dopet-lang, pima nang hukum apot, lapen ke latum kedo-an nangban atumchot.

⁹²Nang Aron jongsi nening arong-i atiri kali pulote, ne kesung ahut ne thilotji apot-lo.

⁹³Nang kepinkhat-heihei ne kaita pangkreve-velo, pima lahei pensi nang nephan pareng-lo.

⁹⁴Neke nangtor lo, nepajoktha! Nang hukum-heihei kekroi-etji ne bor-i-lo.

⁹⁵Kehingno amonit atum nepathijisi inghongding, bonta ne nang Aron-heihei munthibomji.

⁹⁶Asontin amarta ahoi do pu ne chinilo, bonta nang hukum-heihei ke chok-lim.

⁹⁷Nang Aron aphan ne ko-an chinghonloma! Arnikangthim la aputhak ne mathalo.

⁹⁸Nang hukum nelong kaiketa dolo, lapen nehotur atum apar nephan pare-muchot-lo.

⁹⁹thanbang an atum aphan ne chinimuchot-lo, pima nang kepinkhat-heihei aputhak ne munthilo.

¹⁰⁰Kesar amonit aphan mute ne bidi themuchot, pima nang hukum ne kroilo.

¹⁰¹Kehingno a-ot an ne che-o-et-lo, pima nanglam ne kroi-ingtung.

¹⁰²Nang kepinkhat-heihei ne pangkreve-velo, athema nang methangsi ne kurulo.

¹⁰³Nang kepinkhat alam ko-an akedok, ne ingho aphan pijo alang apar dokmu.

¹⁰⁴Nang Aron-heihei pen ne bidi long-lo, lasi kehingno a-ot an ne hijimlo.

¹⁰⁵Nanglam ke nephan kejapon amelur, lapen netovar aphan akethe-ang-lo.

¹⁰⁶Nang ahokpet akepinkhat-heihei kekroijisi ne chechakpamelo.

¹⁰⁷Ne kesung-heihei ke pherememe binong-lo, HEMPHU; nang kechechak ateng pen ne pareng-longtha.

¹⁰⁸Ne nangkero akardom dengtha, O HEMPHU; lapen nang hukum-heihei nethantha.

¹⁰⁹Ne kaiketa ne pran chethongdut-lo, Nang Aron ne tengnene.

¹¹⁰Kehingno amonit atum nephan pham tot-lo, kaiketa nang hukum-heihei ne kroimome-det-lo.

¹¹¹Nang hukum-heihei ke ne kaike kechepahemphu amarlo, lahei nening parong-lo.

¹¹²Ne thithetik an nang Aron-heihei, kekroiver thekjisi chethikthip-lo.

¹¹³Nangphan kekroipameme atum aphan ne hijimlo, bonta nang Aron ne inghonlo.

¹¹⁴Nang ke nekechedanpi lapen nekerai a-Bang-lo, nang kechak alongsi nening thelo.

¹¹⁵Ne pen pahelonon, nang papi arat atum, Ne Arnam ahukum-heihei kroiji.

¹¹⁶Nephan jakong nepitha, nang kechak ason, lapen ne rengpo; nening kechethe along ning pabirirenon!

¹¹⁷Nephan ot-hetnon, lapen ne jokpo; lapen ne nangli hukum-heihei kaita no chedenpo.

¹¹⁸Nang Aron-heihei kekroikre abangphutin aphan nang dengde.

¹¹⁹Kehingno amonit atum aphan bun asonsi nang varlo, lapen ne nang kepinkhat-heihei inghonlo.

¹²⁰Nangphansi ne pherelo, nang kangsai-heihei apot ne kepheresi plengset-lo.

¹²¹Kopisi akechok lapen akeme ne klemlo, ne hotur atum arideng ne-o-ri!

¹²²Nangban aphan rappo pura chechaknon, kesedeng amonit nephan pachenek longri!

¹²³Nang kechak nekepajokji pu akerap aphan, kecholang-ong nemek so-ang-lo.

¹²⁴Nang chemitme akanghon ateng penle nephan nelangnon, lapen nang hukum-heihei nethannon.

¹²⁵Ne nangban kechiniji ajakong nepitha, anke nang kethan-heihei ne chinipo.

¹²⁶HEMPHU, non helo nang keklem nangji aporlo, pima rat atum nang aron kroimolo.

¹²⁷Ser apar nang hukum-heihei ne inghonmuchot-lo, aju kavepin aser aparlo.

¹²⁸Lasi nang nekepinkhat-heihei kroilo, kechokche atovar an ne hijimlo.

¹²⁹Nang akethan-heihei manghumeme; nening kedo-an pen halahei ne kroilo.

¹³⁰Nang kethan-heihei kepajirmidam pathe-ang, lapen kechinine aphan bidi pi.

¹³¹Nang hukum-heihei aphan kar-i neli ingkohamlo.

¹³²Nenat pangnora ne ingjinsotha, nangphan kechinghon an atum aphan nang keklem asonthot.

¹³³Nang kechak asonthot nephan pakli longri, kehingno nephan pahai longri.

¹³⁴Nephan kechenek atum arideng pen nepajoktha, anke nang hukum-heihei ne kroithekpo.

¹³⁵Nelong nang dunra ne pahirjumenon, lapen nang Aron-heihei nethannon.

¹³⁶Langroi asonsi nemekri lidung-lo, pima rat atum nang Aron kroimolo.

¹³⁷Nang dhoromi HEMPHU, lapen nang Aron-heihei ahokpet.

¹³⁸Nang kepitang Aron an mesen lapen chokpet.

¹³⁹Nening arlo me asonsi nening kethi kar-ang-lo, pima ne hotur atum nang hukum-heihei langle.

¹⁴⁰Nang kechak alam an chekokpet, lapen aju ave, la aphan ne ko-an inghon.

¹⁴¹Ne akenangsot abang kali, lapen nehijimrilo, bonta nang kethan-heihei ne langkrangkre.

¹⁴²Nang dhoromipet ke kaike doverji, lapen nang Aron kaita ahokpet.

¹⁴³Ne kesung lapen kemathasi plengset, bonta nang hukum-heihei nephan ning arong pilo.

¹⁴⁴Nang kepinkhat-heihei ke kaike ahokpet, nephan kechini ajakong nepitha lapen ne rengpo.

¹⁴⁵Nening kedo-an pen ne hang-lo, nethaktha, HEMPHU; lapen ne nang hukum-heihei kroithekpo.

¹⁴⁶Ne nangphan nanghang-lo, nepajoktha; lapen nang Aron-heihei ne chebi longpo.

¹⁴⁷Arnivangve aphrang kerap nang pen ne chohang-lo, nang kechak alongsi nening chethelo.

¹⁴⁸Ne jopangthang mek jangjesi tilailo,

¹⁴⁹pima nang kanghon ke chemitme, no chedentha O HEMPHU; nang akangjinso paklangra nechethe neraitha!

¹⁵⁰Nephan nekechenek-ot atum nedung patebokbomlo, latum nang Aron kaita en-e.

¹⁵¹Bonta nangke nedunghetsi do HEMPHU, lapen nang hukum-heihei kaike thirklong.

¹⁵²Aphrang penta nang kepinkhat-heihei ne charlilo, lahei ne kaike padoverji aphan selamlo.

¹⁵³Ne kesung nelangtha, lapen nepajoknon, pima ne nang Aron pangkreve-vedet-lo.

¹⁵⁴Nephan nechedanpitha, lapen nepajoktha; nang kechak ateng nepajoknon.

¹⁵⁵Kehingno atum jokjelo, pima latum nang Aron-heihei kroikre.

¹⁵⁶Bonta nang kangjinso ke thedung, HEMPHU; nang kangjinso paklangra nepajoktha!

¹⁵⁷Ne hotur lapen nekechenek atum ongdung, bonta nang Aron-heihei kekroiji ne sangselo.

¹⁵⁸Hala kechobei atum aphan ne lang-lote, neli kehijim pensi plengset titi; Pima latum nang hukum-heihei rimre.

¹⁵⁹Nang kepinkhat-heihei ne ko-an inghonloma nelangtha HEMPHU; nang kanghon ke kaike prekpre, lasi nepajoktha!

¹⁶⁰Nang Aron ke ahok alongsi paklang-lo, lapen nang dhoromi akangsai-heihei ke kaita jutje.

¹⁶¹Ahok-he pin pen jakongkethe amonit atum netengkheng-lo, bonta nang Aron ne man pilo.

¹⁶²Nang kechak-heihei apot ne ko-an ning arong, adorkeso akhi mane kelong abang asonsi ning arong-lo.

¹⁶³Kechobei kedo-an aphan ne hijimlo, bonta nang Aron ne inghonlo.

¹⁶⁴Arnivang batai throksi ne nangphan chorolo, athema nang dhoromi akangsai apot.

¹⁶⁵Nang Aron aphan kanghon atum an kejokvan longji, lapen thangnat asonta latum aphan pakli un-e.

¹⁶⁶Nang nekepajokji aphan ne chonghongding-lo, HEMPHU lapen nang hukum kepi atengsi ne klemlo.

¹⁶⁷Nang kethan-heihei ne kroilo, lahei nening kedo-an pen kroilo.

¹⁶⁸Nang hukum lapen kepinkhat-heihei ne kroilo, neli keklem ason an nang thek-longpo.

¹⁶⁹Ne kerap kechohang nanglong palenang, HEMPHU! Nang kechak ateng nephan gian nepitha.

¹⁷⁰Ne kardom arjutha, lapen nang kechak ateng nepajoktha!

¹⁷¹Nangphan ne kaike roji, pima nang Aron-heihei nephan thanlo.

¹⁷²Nang Aron aputhak ne lunji, pima nang hukum-heihei ahokpet.

¹⁷³Nephan kerapjile kaita chesiknon, pima nang hukum-heihei ne kroilo.

¹⁷⁴Nang akerap ko-an ne ar-i-loma, O HEMPHU! Ne nang Aron along ning arong long-lo.

¹⁷⁵Nephan chethe nepinon anke ne nangphan ro thekpo; nang kepinkhat-heihei nephan kerap paplangnang.

¹⁷⁶Ne kangbodet abiresak asonsi damtap-lo; lasi vang-ra ne, nangban aphan nerinon; pima nang Aron-heihei ne pangkreve-vedet-lo.