Read Karbi LUN 145 Bible Online

LUN 145 - Karbi bible

LUN 145

¹Ne-Arnam lapen ne-Recho, nangnong ne pathepo, ne kaiketa nangropo.

²Arnivangta ne nangropo, kaiketa ne nangroverpo.

³HEMPHU ke thedung lapen roparpik nangji; alangli nong, ajakong aputhak kematha bidi jutdet.

⁴Nang kopima keklem isi a-ove pen, aphi a-ove anta nangropo; nang kethedung akam-heihei latum pachethangpo.

⁵Nangnong lapen nangdak-nangtur latum ningje phraipo, lapen nang manghumeme akam-heihei aputhak ne matha-epo.

⁶Nang kethedung akam-heihei rat atum ningjephraipo, lapen ne nangnong pathepo.

⁷Latum nang kechingkime alam thanpo, lapen nang kanghon alun lunpo.

⁸HEMPHU inghon lapen ingjinsopik, aningkethi derjon lapen akanghon chemitme.

⁹Alangli bangphutin aphanta mesen, lapen la kepinchong amar an aputhak jinsolo.

¹⁰Nang kepinchong amar an nangropo, lapen nangrat atum an kero nangpipo.

¹¹Latum nang recho ajakong anong alam ningjephraipo, lapen nangjakong alam chethanpo.

¹²Lasi abangphutin nang kethedung akam-heihei, lapen nangrecho-arat adak-atur, ahir-asang alam chinipo.

¹³Nang kepangri kaike aphan, lapen nangke kaike dover arecholo. HEMPHU ke amethang kechak alam chebipame, Lapen alangli keklem aling kangjinso plengset.

¹⁴Kesung kepho abangphan alangli rap, lapen kechingkoi atum aphan alangli rung-lo.

¹⁵Kereng-et amar an alangliphansi ning chethe pen cholang-lo, latum akenang ahut nang latum aphan an pilo.

¹⁶Latum aphan nang dorphlupsi pilo, lapen kadokave akenang an pangkrang-lo.

¹⁷HEMPHU keklem aling dhoromipet, keklem aling ingthirpet.

¹⁸Alangliphan kehang atum an aphan, lapen laphan ahokpet pen kehang abangphan alangli tebok-het.

¹⁹Alangliphan man kepi abang kenangji an alangli pilo, halatum akeningri la arjusi latum aphan pajok-lo.

²⁰Alangliphan kechinghon abangphutin aphan Alangli railo, bonta kehingno aphan Alangli pavirpo.

²¹HEMPHU aphan ne kaike roverpo, alangli kepinchong amar an la amen kangthir aphan parovernang.