Read Karbi LUN 147 Bible Online

LUN 147 - Karbi bible

LUN 147

¹HEMPHU aphan ronon! E-Arnam aphan lun pen keroke mesen, La dokjin lapen alangliphan keroke akemelo.

²HEMPHU ke Jerusalem kimthulo, alangli ke ban kepon an atum aphan vanthulo.

³Aning kangjir-i atum aphan alangli pamelo, lapen halatum areng-heihei amek op-lo.

⁴Chiklolongso aphan alangli pathiktang-lo, lapen asitin aphan amen hang-lo.

⁵Etum a-Arnam ke thedung lapen ingtangpik, alangli bidi pun un-e.

⁶Asotdut atum aphan Alangli rung-lo, bonta kehingno abangphan longle athak patongrop-lo.

⁷HEMPHU aphan kero alun lunnon; e-Arnam aphan kumbeleng ardengnon.

⁸Sining-anghun angsong alangli sang-lo, pirthe aphan alangli arve pilo, lapen inglong-heihei athak bap pachingjok-lo.

⁹Pi atum aphan alangli an pilo, lapen vo-ak aso kehang ahut an pacholong-lo.

¹⁰Kangtang alosei-heihei along alangli aning cheparong-re, mate angthinkethe aron-aso atum alongta kali;

¹¹bonta alangliphan man kepi atum along, lapen alangli kechemitme akanghon aputhak, kechiki alongsi alangli aning cheparong-lo.

¹²HEMPHU aphan ronon, O Jerusalem! Nang Arnam aphan ronon, O Zaion.

¹³Etum anghap-heihei alangli pangtang-lo, nangrat aso aphan alangli pahirjumelo.

¹⁴Nangdet ahoi alangli pajokvanlo, lapen akemenei asoktipli pen nang pangkrang-lo.

¹⁵Pirthe aphan alangli hukum pilo, lapen alangli kepu ason prapjin pen klempatang-lo.

¹⁶Pe-um karthat asonsi alangli ar-e kelok sang-lo, lapen herai athan longle aduk ason papratseilo.

¹⁷Longkoiso asonsi alangli herai nangtoilo, alangli ketoi akangsam komatsi chechak unpoma!

¹⁸Ansi alangli hukum pilo, lapen herai athan ingjirlo; alangli tomon toilo lapen lang lilo.

¹⁹Alangli arat aphan birta pilo, Israel aphan alangli kepinkhat-heihei lapen Aron-heihei pilo.

²⁰Lahei alangli akaprek adet aphan klemkle, latum alangli Aron-heihei chinine. HEMPHU aphan ronon!