Read Karbi LUN 18 Bible Online

LUN 18 - Karbi bible

LUN 18

¹Ne ko-an nangphan chinghon O HEMPHU! Nang nekerai a-Bang,

²HEMPHU si ne-Rai a-Bang; la nepaisong kangtang-lo. Ne Arnamsi nerailo lapen ne jok-lo. Chong ason la nephan railo, la ne raisi nepajok-lo.

³Ne HEMPHU aphan hang-lo, Alangli ke keromeme atheng-lo, lapen la nephan hotur pen pajok-lo. HEMPHU aphan rolo!

⁴Kethi akesung kedo-an nekomchenlo, Kevir angring nethak kong-long-lo.

⁵Kethi akesung nekomchenlo, lapen tipit nephan apham tot-lo.

⁶Kesung ahut ne HEMPHU aphan hang-lo; Ne Arnam aphan ne kerap chohang-lo, La akardomhem along nese arjulo. Ne kerap kechohang akeningri la arjulo.

⁷Anke pirthe klemhursi hijuk-lo, inglong-heihei, lang amek a-arlong klemlo; pima Arnam aning thi-lo.

⁸Anokan pen mehi nangbarlo, isi kechodetji amede lapen kekar-ang ame-akri ahokvai, angho pen nangbarlo.

⁹La sining ingsekdaksi akeng arum inghun ke-ik athan nangbarlo.

¹⁰Avengkong kedo api athak la ingjar paprap-lo, la tomon arveng athak damlo.

¹¹Kangtang pen la amethang chedipthip-lo, inghun karthat, lang keplengset; laphan kompet-lo.

¹²Herai athan-heihei lapen me atur sining ame pen la angno vang-lo, lapen kangting anghun phlak-lo.

¹³Anke sining pen HEMPHU sining ase padolo, herai lapen hokvai-ame paklolo lapen Kangtuinei a-Bang ase arjulong-lo .

¹⁴La athai aso ahotur aphan ap-lo, sining ame pen halatum aphan papratseilo.

¹⁵Halatum aphan ningkethi pen kepu ahut, nang hotur aphan nang kangchek ahut HEMPHU talopi amoi klangdak-lo, lapen pirthe aklong thekdak-lo.

¹⁶HEMPHU angsong pen arum chejotsi nephan ne-ot-thip-lo; lang karnuk pen la nerungtang-lo.

¹⁷La ajakongkethe nehotur pen, lapen nephan kehijim atum an pen nepajok-lo. Nephan ke latum ingtangpik binong.

¹⁸Ne kesung ahutsi latum nephan tengkheng-lo, bonta HEMPHU nerailo.

¹⁹Kesung pen la nerap-lo, La adang thedung adim nevanlo; la nepajok-lo, pima la ne pen aning ingsamlo.

²⁰HEMPHU nephan nong-e-pilo, ne dhoromi ateng, pima ne kopima keklem chokpet; la nephan pahirjumelo, pima nedai ave.

²¹Ne HEMPHU Aron kroipet-lo, Ne Arnam pen ne suisedet-lo.

²²La kedo-an aron-heihei ne klemlo; la ahukum kekroikre avelo.

²³Alangli chini, ne kechokche ave; ne kechokche keklem pen chepahelolo.

²⁴Lasi la nephan nong-e nepilo, pima kopima ne keklem chokpet, pima alangli chini, ne dai ave.

²⁵O HEMPHU, nangphan kekroithip atum aphan nangta kroithip-lo, kechok-lim atum aphan nang mesenlo.

²⁶Ingthir-et atum aphan nangta ingthir-et, bonta ajat kelangno atum aphan ke supong-lo,

²⁷Asotdut atum aphan nang pajok-lo, bonta anekethe atum aphan nang pabihek-lo.

²⁸O HEMPHU, nang nephan kethe-ang pilo, ne kangting nang pakak-lo.

²⁹Nehotur aphan keparemjile nephan jakong nepitha, athe nang pen ajok hotur an aphan parem-un.

³⁰Laso Arnam la akam ko-an kechok-lim! La alam-heihei chikiklong atheng-lo! Laphan kerai keri atum an aphan la chong ason.

³¹HEMPHU inutnatsi Arnamlo, Arnamsi eraichot.

³²La nephan kepangtang Arnamlo, netovar nepajok pame a-Bang-lo.

³³Thijokpi ason ne kengkam pathirlo, la inglong along nephan pajok-lo.

³⁴Ron kechedanji aphan la nethanlo, ansi ne kangtangnei athai jo-unpo.

³⁵O HEMPHU, nang nephan nerailo lapen nepajok-lo. Nang ke-ora nephan pathelo, lapen nangjakong nephan pajok-lo.

³⁶Nephan ban kecheraidetji pen nang nebilo, lapen ne kaita kloklelo.

³⁷Ne hotur aphi phi hungdunlo; halatum aphan ne pavirvetik ne sangsedet-lo.

³⁸Ne halatum aphan arbulo, lapen latum thur thekthedet-lo, latum remsi ne ingno tilailo.

³⁹Ron aphan nangri jakong nepilo, lapen hotur aphuthak pahailo.

⁴⁰Ne hotur atum nangsi ne pen pakat-lo, nephan kehijim atum aphan ne pavirlo,

⁴¹Latum kerap chohang-lo, bonta baduta latum aphan pajokjelo, latum HEMPHU aphan hang-lo; bonta la thakthelo.

⁴²Ne latum aphan arburop-lo, ansi latum longle aduk ason plang-lo, lapen tomon pangjarpondet-lo. Tovarpi anghan patekung asonsi, ne latum athak patekung-lo.

⁴³Nang kethurkrap arat pen nepajok-lo, lapen det-heihei aputhak nephansi pangritoilo; ne kechininepin arat atum neber si donang-lo.

⁴⁴Bang adet aso atum ne ingno angphun patongnang-lo, latum nelam arjulong-lote, latum nekroilo,

⁴⁵Latum angthin chepathe haihelo, halatum apairaikom pen klemhursi nangbarlo.

⁴⁶HEMPHU parengvernang! Nerai a-Bang aphan parovernang! Nekepajok a-Bang Arnam ko-an kethe pachethangnang!

⁴⁷La nehotur atum aphuthak nepahailongtha; Alangli det-heihei nebersi padolo, lapen nehotur pen nepajok-lo.

⁴⁸O HEMPHU, nang nehotur aphuthak nepahaitoilo, lapen avi kepabu amonit pen nerailo.

⁴⁹Lasi khei atum angbong ne nangphan rolo, ne nangphan kero alun pilo.

⁵⁰Arecho aphan HEMPHU pahaipik-lo, David lapen la aso-asu aphan kaiketa kechemitmepin akanghon La kangvaitang abangphan paklang-lo.