Read Karbi LUN 31 Bible Online

LUN 31 - Karbi bible

LUN 31

¹Ne nanglong chepachong-lo HEMPHU, nephan paremlongri. Nang ke dhoromi Arnam, nepajoktha, ne cho-ardomlo

²No chedentha, non nepajoktha! Nephan kerai achong cheplangnon, Nekepajokjile nechedanpinon.

³Nang ke ne chepachong adim, lapen nechedanpi a-Bang-lo. Nang kechechak ateng nejanon lapen neponnon.

⁴Nephan kepadanchekji apham pen nepahelonon. Kesung pen nepachongtha.

⁵Nang kelana aridengsi ne karjong chehodailo, nang nephan nepajokpo, HEMPHU; nang inut kekroithirklong Arnamlo.

⁶Ahok-he a-arnam atum aphan, karcho atum aphan nang hijimlo, bonta ne nangphansi chiki.

⁷Ne chechaksi ning cheparongpo, pima nang kanghon chemitme. Nang ne kesung kechechak thek-long-lo, Nang ne keduk chinilo.

⁸Nang nehotur atum nephan nepanep longledet-lo, nang nephan nening kehang aling nepadam long-lo.

⁹Nephan ingjinsotha, HEMPHU, pima ne kesung-lo.; kechiru nang-ongsi nemek kanghup-lo, ne ainilailo.

¹⁰Ningduksi ne chethe chebengranlo, lapen kechiru nang-loksi ne chethe thihek-lo. Ne kesung ke-ong-ongsi ainihak-lo, Nereppi-heiheita ingjir-ilo.

¹¹Nehotur kedo-an lapen nedung-nerei atum nephan nelangrop-lo, tovarpi along nephan nekethek-long ahut, latum kat-lo.

¹²Ne kethitang atum asonsi, abangphutinta nephan tengne-et-lo. Neke eson kevarchor amar asonlo.

¹³Ongdung hotur atum chethan palamso ne arjudun long-lo. Kepherememe si nekompet-lo. Latum nebe kethurji mang-lo, Lapen nekepathiji aphan mang-lo.

¹⁴Bonta ne kechiki ke nanglong, HEMPHU, nangke ne Arnam,

¹⁵Ne kaiketa nang ke-ora alongsi dolo, nehotur pen nepajoktha. Nephan kepasung atum arideng penta nepajoktha.

¹⁶Nangban aphan kangjinso pen langtha; nang chemitmepin akanghon angkang penle nepajoknon.

¹⁷Ne nangphan nanghang-lo HEMPHU, nepatherak longri, kehingno atumle patheraknang, latum chom anat padamjoi lonang.

¹⁸Lahei chobeichot atum aphan padojoinon. Anekethe lapen kesedeng atum an aphan, Dhoromi abangphan kepinrem alam keningje atum an.

¹⁹Nangphan man kepi an atum aphan kebipi amar, ko-an manghumeme loma! Abangphutinta nang mesen pu chini, Nangphan kechiki atum aphan Nang rai pame.

²⁰Nang ingno kejokvan adim latum aphan, nang kehingno kemang amonit pen patulo; Kejok chepachong adim nang latum aphan, Hotur akepinrem pen patulo.

²¹HEMPHU aphan rolo! Nephan kekompet lapen ketengkheng ahut, La akanghon ko-ansi manghumeme pen, Nephan paklang-loma!

²²Ne pherelo lapen nephan angno pen nephlungjuilo pu mathalo, bonta ne laphan kerap kehang ahut, ne kehang la arjutang-lo.

²³La kedo-an kekroithip arat atum, HEMPHU aphan chinghonnon, Bonta anekethe atum aphan, Latum kephonangji adukpinon.

²⁴HEMPHU aphan ningkethe atum an, chepangtang-rak non, ingthin chepathenon.