Read Karbi LUN 33 Bible Online

LUN 33 - Karbi bible

LUN 33

¹Nang dhoromi atum, HEMPHU keklem apot, Ning arong pen hangjonon; Laphan kekroi atum an laphan ronon.

²Kumbeleng-heihei pen HEMPHU aphan keropinon, Ari kedo akum pen laphan lunnon.

³Laphan lunkemi pen lunnon, asai pen kumbeleng ardengnon, lapen ning arong pen hangjonon.

⁴HEMPHU alam-heihei ahok, lapen la akam an chikime atheng.

⁵Kopisi dhoromi lapen ahokpetma, HEMPHU aningdok-lo. La kechemitme akanghon, pirthe paplengset-lo.

⁶Sining-heihei HEMPHU ahukum pen pinchong-lo, arni, chiklopi, lapen chiklolongso-heihei, Alangli keningje alam pen pinchong-lo.

⁷Talo alang kedo-an La elong adim pangrumlo, la marpuru-heihei along talopi akarnuk arlo bilo.

⁸Pirthe adang HEMPHU aphan archonon! Pirthe arat an laphan manpinon!

⁹La ningjelo lapen, pirthe plangtang-lo; la ahukum pen asontin nangklangtang-lo.

¹⁰Kekroikre adet-heihei akemang, HEMPHU pavirlo; lahei kepaklemlongji pen la pahelolo.

¹¹Bonta la akemang kaike dover; la aning arlo akemang a-ove-ove mate kaita dover.

¹²Khei atum a-Arnam ke HEMPHU helo, pu kehok atum an ke rengme, lapen amethang aphan La kangvaitang arat atum rengme!

¹³HEMPHU sining pen lang, lapen kedo-an amonit akhei aphan thek-longpet.

¹⁴La kepangri adim pen, pirthe kedo-an aphan la arum lang-lo.

¹⁵Halatum akematha-heihei la si pinchong-lo, lapen latum asontin akeklem chinipet.

¹⁶Jakong thedung aron-armu pen inut arecho hai-un-e; ron aso ajakong pen la haihe.

¹⁷Kehaiji aphan ron alosei-heihei akam ave, halahei ajakongkethe pajok un-e.

¹⁸HEMPHU aphan kekroi abang aphansi la lang, lapen la chemitme akanghon aphan kechiki atum.

¹⁹Kethi pen la pajok-lo, akhim ahut latum aphan la pareng-long.

²⁰Eli HEMPHU, aphansi ningchethe, la e-Rai a-Bang lapen ekerap a-Bang.

²¹La ajok eli chehok; la amen Kangthir aphan eli chiki.

²²Netum nanglong ning kechethe asonthot Nang chemitmepin akanghon; netum along padonang, HEMPHU.