Read Karbi LUN 35 Bible Online

LUN 35 - Karbi bible

LUN 35

¹Nephan kekhang atum an aphan, khangtha HEMPHU, lapen nebe thursi kechedan atum an pen chedantha!

²Nangchong lapen ron arisim che-enra nepajokji aphan vangnon.

³Nang chir lapen nang cho nephi phi kehung abangphan chirungnon. Nephan pajokji pu chechaknon.

⁴Nephan kepathiji pu kebor-i atum, paremnang lapen palangremlonang.

⁵Latum aphan HEMPHU apherangke, aphi akehung ahut tomon aphek-e, kepon ason paplangnang.

⁶Latum aphan HEMPHU apherangke karbu ahut, latum atovar pangtingkuknang lapen panglitnang!

⁷Athe avepin pen latum nephan phamtot-lo, lapen nekenepji aphan hilik hut-lo.

⁸Bonta latum la chinine aphrang, kevir latum aphan neppo. Latum amethang apham along chedanpo, Lapen latum akevir along kreppo.

⁹Anke HEMPHU pen ajok ne chehokpo, nening arongji pima la nepajokpo.

¹⁰Nening aklong pen ne HEMPHU aphan pupo, “Nangsonthot nahokta ave. Nang kangtang arideng pen ke-aini aphan, Lapen kechenek arideng pen keduk aphan railo.”

¹¹Kehingno abang nebe thursi chobei ahaki cholo, lapen ne kechinine pin pran-karmut alam nebok-lo.

¹²Akeme alar latum kehingnosi nepilo, lapen ne langlutchok-lo.

¹³Bonta latum so-lote kechiru pen ne lanalo; an chochesi ardom pilo,

¹⁴nejirpo mate ne korte aphan kardompi ason. Bangle apei aphan kechiru asonsi, Ne tongkisi chirupibomlo.

¹⁵Bonta ne sung-lote latum kedo-an la chehok-lo, lapen nechongthuijisi nekompet-lo, lapen nethengbomlo.

¹⁶Monit atum kengkok aphan kechongthui asonsi, latum kehijim pen nelang-lorpo.

¹⁷Ko-ansi HEMPHU nang nelangding bomjilangma? Latum aketengkheng pen nang nepajoknon; Ne pran lahei ahingho pen nepajoktha.

¹⁸Anke nangrat kechingrum along ne nangropo. Latum kedo-an angno nangropo.

¹⁹Kechobei nehotur atum, ne kerem aphuthak pachehok-longri, athe avepin pen nephan kehijim atum, ne keningri ahut nephuthak aning parong longri.

²⁰Latum jirpo ason chingki chethanthe, la kalilesi ningkangsam aningkedok arat atum aphuthak, kechobei ason an latum ripo.

²¹Latum nebok-lo, hang-lo, “Nang keklem netum nangthek-long-lo!”

²²Bonta nang HEMPHU, la thek-long-lo. Lasi dojoirinon HEMPHU; Nang kedo chepahelorinon!

²³Thurra, HEMPHU, ne chedanpitha; thurnon, ne Arnam, nechoningripinon.

²⁴Nang dhoromi, O HEMPHU, lasi nedai avepu pachethangnon; nehotur atum nephuthak pachehok-longrinon,

²⁵Latum angbong, “Me-olo! Lahelo etum ening kehang-lo!” pu papulongri.

²⁶Ne kesung aphuthak, aning cheparong abangphan, paremdetnang lapen pamanghunang; nephan mute latum memu pu kechepu atum an, ketherak lapen kelangrem pen paplengsetnang.

²⁷Ne nedai ave pu kelangji aningkehang atum an, aning arong pen pahangjonang, lapen “HEMPHU ko-an akethe! Aban kechanlong la aningdok-lo.” pu pahang lethotnang.

²⁸Anke ne nang dhoromi pu pachethangpo, lapen ne arni kangthim nangphan ropo.