Read Karbi LUN 36 Bible Online

LUN 36 - Karbi bible

LUN 36

¹Kehingno amonit aning arlo pap ningje; La Arnam aphan dengde lapen laphan man pipe.

²Pima la ingtuipik pusi amethang chemathalo, Arnam la apap phurphelo, Lapen la khindedelo pu chemathalo.

³La alam kehingno saide lapen kechobei saide; bidi lapen akeme akam la kaita klemkle.

⁴La ahongplang along ketilai ahut, kehingno akamsi mang-lo; lapen kehingno an la varvelo.

⁵HEMPHU, nang kechemitmepin akanghon sining pholo; nang akekroithirklong sining-inghun lelo.

⁶Nang dhoromi inglong ason ingtuiving-lo, nang ahok akangsai talo aklong ason thirlo, monit lapen pi atum nangridengsi dolo.

⁷Nang kechemitmepin akanghon, ko-an ador soloma, O HEMPHU! Nang arveng abin netum chetebin long-lo.

⁸Nang kepitang ongdung a-an aputhak netum arong chepilo. Nang ningkeme aroi pen, Netum aphan nang lang pajunlong-lo.

⁹Chethe an atiri nanghelo, lapen pima nang akethe-ang pensi, netum kethe-ang thek-long-lo.

¹⁰Nangphan kechini atum an, nang chinghonverji, lapen dhoromi aphan akeme klempinon.

¹¹Anekethe amonit nepa-tengkheng-longri, lapen kehingno amonit nephan paphlung-longri.

¹²Kodaksi kehingno amonit kekloma langnon. Hadak latum thilo, thur-un-elo.