Read Karbi LUN 37 Bible Online

LUN 37 - Karbi bible

LUN 37

¹Kehingno atum pen apot ning chepa-oiri, kechokche keklem abangphan, lang-un-e nangne.

²Bap kekrenghak asonsi latum, prapjin pen avedetji kethikhrai athengpi kethi asonsi latum thipo.

³HEMPHU aphan chikira akemele klemnon; det along dora chepajokvan non,

⁴HEMPHU along ning cheparongnon, lapen la nangning kar-i ason nang paplengpo.

⁵HEMPHU aphan chehodainon; laphan chikinon, lapen la nangrappo;

⁶Anerlo chitim arni asonsi, nang dhoromi la nang paplangpo.

⁷Chepaningdingra HEMPHU kepaklemlongjile inghongnon; kechingthur-o atum pen apot, mate bang kehingno akemang akam kechun apot nangning chepa-oiri.

⁸Ning ke-oi lapen ningkethi che-onon; la kesung anatsi japonchot lapen kehingno klemri.

⁹Pima HEMPHU aphan kechiki abang, longle chepahemphu longji, bonta kehingno aphan ke phlungjuipo.

¹⁰Kehingno atum avedapprangpo, nang latum aphan ri seta, latum aphan longlelo.

¹¹Chepabihek abang longle cherailongji lapen chingthurji, lapen ningkangsam pen ning chepajanglongji.

¹²Kehingno atum akeme amonit abe thursi bidi langno mangpo, lapen laphan kehijim pen langpo.

¹³Bonta kehingno amonit aphan, HEMPHU ingnekchoipo, Pima latum aphan pavir dapprangpo pu la chini.

¹⁴Keduk lapen keboi atum aphan kepathiji, lapen kechok akam keklem abangphan kepathijisi, kehingno abang anokjir chesanji, lapen athai pangkangji.

¹⁵Bonta latum amethang anokjir pen chepathipo, lapen halatum athai ching-lok-etpo.

¹⁶Kemesen abang asap-o amar chepa HEMPHU longchot, seta kehingno abang kedo-o akhi apar memu,

¹⁷pima kehingno atum ajakong HEMPHU pondetpo, bonta keme abangphan raipo.

¹⁸HEMPHU aphan kekroi abangphan la oraver, lapen longle halatum longverpo.

¹⁹Kehingno ahut seta latum sungselo, akhim ahut seta latum dorphlupji.

²⁰Bonta kehingno atum thiji; ingnam amir ason HEMPHU ahotur atum virpo, mehi ason latum avedetpo.

²¹Kehingno abang choram seta chetute, keme amonit abang adan-heihei pen pipo.

²²HEMPHU kepahirjume abang, longle chepa HEMPHU longpo, bonta la ahirjuno kepi abangphan la phlungjuipo.

²³Inut amonit kedam nangji atovar HEMPHU jalo, lapen alangliphan aning kepadok abangphan la railo.

²⁴Latum jongsi chingkoi seta, latum doverve, pima HEMPHU latum aphan varchor khangjangje lapen latum aphan kangthurjisi otdunpo.

²⁵Non ne inut akesar amonit-lo, ne arta do-olo, bonta kemesen abangphan HEMPHU ke-o, mate la asomar kechorek-nangset ne thek-longlepinlang.

²⁶Kaiketa la akejoisi pilo, lapen bang aphan paramlo, lapen la asomar isi ahirjumelo.

²⁷Kehingno pen chiruinon, lapen akemele klemnon, lapen nangso-nangsu kaiketa dolongverpo.

²⁸Pima kechok ason HEMPHU inghonlo, lapen la kekroithip arat aphan o-elo, latum aphan raiverlo; bonta kehingno aphan phlungjuipo.

²⁹Dhoromi abang longle chepahemphu longpo, lapen la along dolongverpo.

³⁰Kemesen amonit alam along gian dolo, lapen la kaiketa ahok akangsai alangsi sengji.

³¹Aning arlo la Arnam aron chebilo, lapen kaita la pen suiselo.

³²Kemesen abangphan kehingno abang tonding, lapen laphan kepathiji bor-i.

³³Bonta laphan hotur arideng HEMPHU obupbe, mate laphan kangsai ahut papurip longle.

³⁴HEMPHU aphan ningchethera la Aron-heihei kroinon, nangphan longle nangkepi pen ajok la man nangpipo; lapen kehingno aphan kephlung nang thek-longpo.

³⁵Inut ajakong kedo kehingno amonit ne ephong chini, Lebanon a-Kedar athengpi asonsi, la abangphutin apar chepangtuilo;

³⁶bonta aphi ne kedam ahut la hadak ave, ne laphan cholang-lo, bonta ne laphan thek-longledet-lo.

³⁷Keme amonit aphan pangthek-ra dhoromi abangphan langnon; inut ingsamjin amonit aso-asu doji,

³⁸bonta papi aphan pavirdetji, lapen latum aso-asu aphan pavedetpo.

³⁹Dhoromi abangphan HEMPHU pajokpo, lapen kesung ahut Alangli ke latum ajakong-lo.

⁴⁰Latum aphan la rap-lo, lapen pajok-lo; kehingno arideng pen la latum aphan pajok, pima latum la along chepachongdam.