Read Karbi LUN 38 Bible Online

LUN 38 - Karbi bible

LUN 38

¹O HEMPHU, nangningkethi pen nephan aduk nepiri!

²Nang thai aso pen nang nephan amek padolo, nang nephan nechok-lo.

³Nangning kethi apot ne sodak-lo, nepap apot nebang arpum bithe amek saidelo.

⁴Nepap alangthepi arlosi ne inglimchok-lo, lahei ke ne kechechak un-e anghorlo.

⁵Pima ne luvok pen apot, ne ingthum amek nemthuhailo, lapen thuvok-lo;

⁶Ne kurvonlo, ne chinghumbup-lo; losini ne chirulo.

⁷Keso si ne krulap-lo, lapen ne thiji dokdok-lo.

⁸Ne ainihak-lo, lapen neberlamlo, nening klemhurlo, lapen kesosi ne ar-emlo.

⁹O HEMPHU, neningkehang ason nang chini, ne kar-em nang arjulong-lo.

¹⁰Nening dip dip-lo nejakong damphak-lo, lapen nemek chechar-o-edet-lo.

¹¹Ne reng amek pen ajok, Nejirpo atum lapen nedung nerai atum nedung vangve, Nehem asangho atum anta ne pen chepahelo-et-lo.

¹²Nephan kepathiji atum nephan pham tot-lo, lapen nereng kepasoji atum nepavirjisi netherlo. Latum nephan bidilangno kemang ingtonte.

¹³Ne nothong amonit asonsi arjulongle, lamve asonsi ningje un-edet-lo.

¹⁴Kethak thekthe amonit asonlo, pima ne arjulongle.

¹⁵Bonta ne nangphansi chikilo, HEMPHU, lapen Nang ne-Arnamsi nethakpo.

¹⁶Ne kesung aputhak ne hotur atum nepangnek-longri!

¹⁷Ne kethiji dokdok-lo, lapen ne keso chemitmedet-lo.

¹⁸Nepap-heihei ne chekobirlo, lahei nening pa-oilo.

¹⁹Ne hotur atum a-ok mesen lapen ingtangrak, athe ave pin pen nephan kehijim atum ongdung.

²⁰Keme alar kehingno klemlo, latum nebethurlo, pima ne akechoksi klemlo.

²¹Nephan ne-ori O HEMPHU; ne Arnam, ne pen chepahelori!

²²Non nerapnon, O HEMPHU, nekepajok a-Bang!