Read Karbi LUN 39 Bible Online

LUN 39 - Karbi bible

LUN 39

¹Ne pulo, “Ne keklemji cherepo, lapen nede nephan pap paklem longledetpo; kehingno abang nedung dolote, ne thangta ningjejelo.”

²Ne dojoilo, etheta ningjejelo, akeme alamta ningjejedet-lo!

³Bonta ne kesung nanglitbomlo, lapen ning kedonosi nephan nehaidet-lo. Ko-an ma ne kematha la-ansi ne sung-lo; Ne arjuje do-un-edet-lo:

⁴“HEMPHU ne ni ko-an rengjilangma? Ne komantusi kethipo” Nekai komantusi kejutjima, nethantha?

⁵Ne chethe nang kepinchong pathihek. Nang ingno nekai achethe thangta kali,

⁶Harchi alonrekta ave. La keklem ason an ale ave; La akhi pangrumlo, Bonta la komatsi chepahemphu jima chinine.

⁷Tangte ne kopi asonsi nening chethepo, HEMPHU? Ne nangphansi ning chethelo.

⁸Nepap kedo-an pen nepajoktha, lapen kelu atum nephan pangnekchoilongri,

⁹Ne dojoipo, ne etheta ningjejelo, pima nangsi lason pachechakjisi nephan thip-lo.

¹⁰Nephan aduk nepi nangnelo! Nang neketeng pen ajok ne thirang-lo.

¹¹Inut pap keklem amonit aphan nang kangchek pen ajok aduk pilo, lapen la aningkehang amar, bitu aphan kepathi asonsi pathilo, Ahok-lo monit ke chethe kevang ben asonchot.

¹²Ne kardom arjutha, HEMPHU, lapen nese arjutha; ne kechiru ahut neraptha. Nephusar atum ason, ne malomso aphan Nang alohichot.

¹³Ne thithe ako, inutvet nepadolongtha, anke ne rengmepo.