Read Karbi LUN 40 Bible Online

LUN 40 - Karbi bible

LUN 40

¹HEMPHU akerap aphan ne chonghongding-lo, anke la ano chedenlo, lapen ne kehang arjulo.

²Kepherememe ahilik pen la nerung-lo, lapen kethinangji asangti ajo pen! La nephan arlong athak nebatsi pajok-lo, Lapen jokvansi nepadolo.

³Lunkemi kelunji la nethanlo, netum Arnam aphan kero alun. Ongdung atum la kethek-long an cherelo, Lapen halatum HEMPHU aphan chikilo.

⁴HEMPHU aphan kechiki atum rengme, kumlin-heihei anat kesuise atum, mate ahok-he arnam-heihei aphan karcho along kejelangdunde atum.

⁵Nang netum aphan ongdung akam ne klempilo, netum Arnam HEMPHU, nangsonthot nahokta avelo! Netum aphan nang ke-ongdung manghumeme akam Nang mang-lo. Halahei ne ningje-et un-e Lahei aphai ongpik!

⁶Nang athok-heihei lapen dan-heihei nangning hanghe; nang dovan athok pi arpum kephrin mate pap kepakakji athok-heihei nang hanghe. Bonta nangse karjuji nephan neno hini nepilo.

⁷Lasi ne thak-lo, “Ne daksi do; nang nephan kepinkhatji Aron aloh along do-et-lo.

⁸O Ne Arnam, ko-an ne nangningkehang ateng keklemji neninghang-lo! Nening arlo nang kethan alam nening chebilo.”

⁹Nangrat kechingrum amei along HEMPHU, nang netum aphan kepajok abirta-keme alam thanlo. Nang chini ne laso alam kethan ingtontelo.

¹⁰Nang kepajok abirta nemethang aphan ne chebijoijedet-lo, ne kaiketa nang akekroi athikpet, lapen akerap alamsi ningjelo. Nang akechingkime lapen kechemitmepin akanghon alam, nangrat kechingrum amei along kethanji aphan dojoijedet-lo.

¹¹HEMPHU nang nephan kangjinso ingtonte pu ne chini. Nang kanghon lapen kechingkimesi, Nephan kaiketa nepajokpo.

¹²Nephan ake-ongpi akesungsi nekomchenlo, kelakhaji ongdung! Nepapsi nephan nenepchek-lo, lapen nephu achu apar ongmulo, lapen ne ingthin chepathe haihedet-lo.

¹³Nepajoktha HEMPHU! Non neraptha!

¹⁴Ne kepathiji kebor-i atum, paremdet lapen pamanghunang. Ne kesung apot ning cheparong atum, pachiruira anong pajunonang.

¹⁵Nekangnekchoi atum, halatum keremnang pen ajok aningparun nang.

¹⁶Nanglong kevang atum an, Pachehok lapen ning parongnang. Nang kejok apot nangphan kero atum an, “HEMPHU Thepik!” pu papuvernang.

¹⁷Ne ainihak lapen dukpik O HEMPHU, bonta nang netengnenelang. Nang nepajok a-Bang lapen ne-Arnam, Nerap seraknon!