Read Karbi LUN 49 Bible Online

LUN 49 - Karbi bible

LUN 49

¹Abangphutinta laso alam arjutha! Arjutha, bithe-bitha arat kedo-an atum,

²kethe lapen kebi, keplang lapen keduk kedo-anta.

³Ne kematha kengset; bidi-sore alamsi ne ningje,

⁴Ne sarlamthe-heihei anatsi no chedenji, lapen ne kumbeleng kerot ahut, halahei athe pajirmi.

⁵Nephan hotur atum nekompet seta, kesung apor ahut seta ne pherere.

⁶Kehingno amonit halatum akeplang aphan kechiki atum lapen halatum akhi pen chepindak seta pherere.

⁷Inut amonit amethang chepajok thekthe, la achethe alar Arnam aphan anam pi un-e,

⁸Pima monit achethe anam kepinangji thedung.

⁹Thiri pen laphan kepaheloji, laphan kaike cheparengverji aphan, la pi-o seta dorphlup-phle.

¹⁰Thek-kere atum ta thi la baduta chini, latum kedo-an akhi-heihei aso-asu aphan chetekang nang-lo.

¹¹Halatum athiri ke halatum aphan kaike ahemlo, latum ehut isi amethang alongle do seta; latum kaike hadaksi dolo.

¹²Inut amonit akethe laphan thiri pen pajok un-e, marat api atum asonsi la thinang-lo.

¹³Langtha amethang aphan, kechiki atum kopi plang-loma, amethang akhi pen aning chepajang atum akopai langtha-

¹⁴Latum biresak atum asonsi thinangvekpo, lapen la kethi ke latum aphan phinpo, latum aphan dhoromi abang haipo, latum abang thuvoksi, chom ke halatum akelangme lapen ahem-heihei joi-etpo.

¹⁵Bonta Arnamsi nepajokpo; kethi ajakong pen alangli nepajokpo.

¹⁶Inut amonit plang-lote nangning oi nangne, hala akhi ongthubom setalo.

¹⁷La thilote, la thangta chepon longle; tipit along la akhi dundelo.

¹⁸Inut abang jongsi akai pen, ning chepangsamlo seta, lapen la keklem kechunlong apot laphan rohurlo seta,

¹⁹kethi ahut la aphusar atum kedo-an along chelangdunpo. Hadak kaiketa kangting doverpo.

²⁰Inut amonit Arnam do bonta akechini ave; la marat api atum asonsi thinangpo.