Read Karbi LUN 51 Bible Online

LUN 51 - Karbi bible

LUN 51

¹O Arnam nephan ingjinsotha, pima nang kanghon chemitme, Nang kangjinso thepik apot nepap kedo-an pakak et tha!

²Kehingno ason an necham-et tha, lapen pap pen nepangthirtha!

³Ne kelet ne chechinilo; Ne papta ne-ingnosi kaike doverlo.

⁴Ne nangphan langplotsi pap klemlo, la nangphanchot- lapen nang kehingno pu kehok ason an ne klemlo. Lasi nang nephan kangsai ke mesenlo; Nang nephan nekedin ke mesenlo.

⁵Ne mahang kethek arni pen ne hingnolo, nepai apok arlo kedo ahut pen ta ne pap a-ot dolo.

⁶Keklem kenir-e lapen ahokpet asonsi nang rilo; lasi nening nang gian penle paplengnon.

⁷Ne pap pakaktha, lapen ne ingthir-etpo; ne chamnon, lapen ne herai kelok apar lokphlanpo.

⁸Ning arong lapen kechehok arki neparjulongtha; lapen neberlam seta lapen ne ingdirop seta, ne puthot aphong chehokthuji.

⁹Ne pap anat nangmek selokjok non, lapen ne kehingno an pakak etnon.

¹⁰Nening arlo ning kangthir ne pinchongtha, O Arnam, lapen ning arlo isi akemi lapen kekroi akarjong nebitha.

¹¹Nang ingno pen nephlungri; ne pen nang karjong kangthir ponrinon.

¹²Nang kejok pen kevang aning arong nephan nepithutha, lapen nangphan kekroithekjile nepinchongtha.

¹³Anke papi atum aphan nang hukum-heihei ne thanpo, lapen latum nang nat chetevarpo.

¹⁴Ne pareng-longtha, O Arnam, lapen nepajoktha , lapen nang dhoromi kechehok pen ne pachethangpo.

¹⁵Keningjeji aphan neraptha, HEMPHU, lapen ne nangphan nangropo.

¹⁶Nang athok-heihei rire, mate lahei ne kepijita nang hanghe, kephrin athok-heihei pen ta nangning dokde.

¹⁷Ne athok ke kechepabihelo, O Arnam, kechepabi lapen ning kecherui aning nang dengmome.

¹⁸O Arnam, Zaion aphan jinsotha, lapen bangpi aphan raptha. Jerusalem apaisong-heihei kimthutha.

¹⁹Anke athikpet athok pen, lapen netum kephrin adan-heihei nangning ingsampo. Lapen nangdovan athak chainong-heihei athok pipo.