Read Karbi LUN 59 Bible Online

LUN 59 - Karbi bible

LUN 59

¹Nehotur pen nepajoktha, ne Arnam; nephan ketengkheng atum pen neraitha;

²lahei kehingno amonit pen nepajoktha; pran-karmut atum pen nepajoktha!

³Langtha! Latum nephan kepathijisi inghongding-lo, kehingnopik amonit atum nebethursi chingrumlo. Lake nele pine apap mate kechokche akam keklem apot kali,

⁴mate ne pine kelet apot kali, O HEMPHU, setta latum adim-heihei chekat-lo, lapen chesik-lo.

⁵Thurnon Jakongkethenei Arnam, HEMPHU, lapen nephan nerapnon; nangmethang chelangnon, Israel a-Arnam thurra kekroikre atum aphan aduk pinon. Kehingno chobeichot atum aphan kangjinso paklang nangne!

⁶Latum arnikangsam ahut methan ason ing-uk ponlo.

⁷Halatum akangnekchoi lapen akephere arjutha. Latum ade-heihei alam angho arlo nok kedo asonlo, Tebonta latum aphan baduta arjudun longle pu chemathalo.

⁸Bonta nang latum aphan ingnek-lo HEMPHU, kekroikre atum an aphan nang ingnekchoilo.

⁹Nangjakong aputhak ne ning chethelo, nang chepachong adimlo, O Arnam.

¹⁰Ne Arnam nephan inghon lapen nelong vangpo, ne hotur atum kerem la nepathek longpo.

¹¹Latum aphan pathiri O Arnam, mate nerat atum tengne tahai. Nangjakong pen latum aphan papratseinon, Lapen paremdetnon, HEMPHU netum Rai-a-Bang.

¹²Pap ke latum ade angchunlo, latum alamthe an pap plengset-lo. Latum anekethe along panep-longcheknang.

¹³Pima latum ahirjuno hang-lo, lapen pachobeilo, nangning kethi pen latum aphan pavir-etnon, lapen Arnamsi pirthe adang anta, pangrilo pu abangphutinta chinipo.

¹⁴Ne hotur atum arnikangsam chevangthu, rongsopi kedam ahut methan ason ing-uk-lo.

¹⁵Methanle an kechori kedamvoi ason, lapen dorphlup longlete pasimupo.

¹⁶Bonta nangjakong apot ne lunji, adapprangta nang kechemitme akanghon alun lunji. Nang ke ne kechepachong adim plangbomlo, Ne kesung ahut achong-lo.

¹⁷Nangphan roji ne kechedanpi a-Bang. Ne chongke Arnam, nephan nekanghon Arnam.