Read Karbi LUN 60 Bible Online

LUN 60 - Karbi bible

LUN 60

¹Nang netum aphan nedengmolo, netum aphan paremdet-lo; bonta non nang netum anat nangchiruinon.

²Nangdet paklemhur, lapen nang la phlakdak-lo; non la amek pamenon, pima la cheklopo.

³Nang rat aso aphan kesung pachechak olo, netum hor kangri nangnaksi krep-ring-rang-lo;

⁴Nangphan man kepi atum aphan nang pacheretoilo, anke latum kevir pen jokpo.

⁵Nangjakong pen netum aphan pajoktha, netum akardom nethaktha. Ansi nang kechinghon arat aphan pajok-unpo.

⁶La ahem Kangthir pen Arnam pulo, “Ne Shekem phlakdaksi Sukkoth Arlok, nerat aso aphan ronpo.

⁷Gilead lapen Manassehta nemar, Ephraim ke nephutup-lo, Lapen Judah ke nerecho achinlo.

⁸Bonta Moab aphan ne kecham aphule rimpo, lapen Edom aputhak nekeng-op varpo. La aputhak Ne chepahemphulo pu angthek-lo. Philistia atum nephuthak kehailo, pu hang longpo putong latum kemathama?”

⁹O Arnam, komatsi nephan paisong, kedo arongsopi along neponpoma? Komatsi nephan Edom anat nejaponpoma?

¹⁰Nang netum aphan chenamsi nedengdeloma? Netum aron-armu atum pen nang bar-rap-reloma?

¹¹Hotur abethurra netum aphan raptha, Monit akerapchot ke thangta kali.

¹²Netum along Arnam dolote, la ne hotur atum aphan paremji.