Read Karbi LUN 62 Bible Online

LUN 62 - Karbi bible

LUN 62

¹Chenamsi Arnam nekepajokji aphan ne chonghong chepaningding-lo, La aphansi nening chethechot.

²La inutnatsi nephan neraichotji; la nekechedanpi a-Bang, lapen ne kaita remrelo.

³Nangtum kedo-an inut amonit aphan, ko-an ajirkeding tengkhengji, la kerutang apai apar ingtangte?

⁴Nangtum laphan aman anghoi pen kepasunji aphan ninghangchot-lo, kechobei akam nangtum nangning dok-lo, ahirjume alam nangtum ningje, bonta nangning arlo nangtum laphan ahirjunosi hangpilo.

⁵Arnam aphan si ne chikichot, laphansi nening chethe

⁶Alanglisi neraichot lapen nepajokchot, la nechedanpi a-Bang-lo, lapen ne kaiketa remrelo.

⁷Nekejok lapen neman Arnam aphuthaksi do, la ingtangrak Rai a-Bang; la nechong.

⁸Nerat atum, Arnam aphan kaike apor chikitu. Nang kesung kedo-an laphan chethannon, Pima la etum chepachong adimlo.

⁹Monit atum an esan chethe kevangphun ason chot, thedung lapen bihek atum seta thangta kali. Kelin adim lin lote, latum ardi ave; Latum him apar arjangthulang.

¹⁰Kephangno aphan nang chikiri, Kethiparohum pen thangta kelongji ning chethiri; Nang khi chanbom seta, lahei aputhak chikiri.

¹¹Ephong Arnam pulo, ne phongni arjulong-lo laso ajakong La alongsi do.

¹²Lapen La akanghon kaike dover. Nangmethang O HEMPHU, abangphutin aphan akam ateng nong-e-pilo.