Read Karbi LUN 65 Bible Online

LUN 65 - Karbi bible

LUN 65

¹Arnam, Zaion along nangphan netum kero, lapen nangphan netum akechechak kebi la mesenlo,

²pima nang netum akardom-heihei thak-lo., Bithe-bitha pen rat atum halatum apap apot nangdung vangpo.

³Netum akeletsi netum aphan paremlo , bonta nang halahei diya-et-lo.

⁴Nang kangvai atum nanghem kangthir along kepadojisi kevan atum rengme. Nanghem akeme amar pen netum ning chepajang-lo, Lahei nang Kardomhemthepi Kangthir ahirjumelo.

⁵Nang netum aphan kepahai pen ajok netum aphan thak-lo, lapen netum aphan kepajokjisi nang manghumeme akam klemlo, Pirthe athak arat kedo-an, lapen kehelo talo parai-heihei kedo-an atum Nangphan chikilo.

⁶Nangjakong pen ajok nang inglong-heihei bilo, la nangjakongkethe paklang-lo.

⁷Talo-heihei kehorisai arki, lapen lang adihu arki nang pahamlo, rat atum akehangjo nang pahamlo.

⁸Nang thedung akam keklem apot, pirthe adang manghuphrong-lo, pirthe kejut ahin pen ahin kaprek an nangkam-heihei apot, ning karong akehang vanlo.

⁹Arve nang ketoi pen ajok nang longle aphan oralo pu paklang-lo; la nang paplang-olo lapen aho-or padolo. Langjeng nang lang pen paplengset-lo.

¹⁰Lasonsi nang la klemlo, kebaitang ahidi ajo nang dorphlup arve nangtoilo, lapen lahei lang pen pachamlo. Nang lang pen longle pangduk-lo, lapen thengpi aklim pathetoilo.

¹¹Nang sokthe akeme pilo! Nang kedam aling hadak plengset.

¹²Bap ahidi-heihei pi ahursi plengset-lo, inglongso-heihei ning arongsi plengset-lo.

¹³Hidi-heihei biresaksi dipthip-lo, arlok-heihei soktiplisi plengset-lo. Asontin ning arong alam-heiheisi hangjolo.