Read Karbi LUN 66 Bible Online

LUN 66 - Karbi bible

LUN 66

¹Rat kedo-an ning arong akehangjo penle Arnam aphan ronon!

²La amen adak-atur aphan lunnon; anong akero laphan pinon!

³Arnam aphan punon, “Nang keklem akam ko-an manghumeme! Nangjakong lapu-an kethe nang ingno hotur atum, kephere pen angphun tongkilo.

⁴Pirthe athak abangphutin ta nangphan archolo, latum nangphan kero alun lun, latum nangmen aphan kero alun lunlo.”

⁵Alangli monit atum angbong manghumeme akam keklem, vang-ra Arnam kopi klemloma nanglangnon.

⁶La talo aphan kekreng alongle pinchong-lo; nangphusar atum akeng pen langroi hatpet-lo. Hadak netum la keklem apot ning cheparong-lo.

⁷La ajakong pen ajok kaike pangrilo, lapen la amek det-heihei aputhak lang-lo. Baduta la abe pathur longlenang.

⁸Khei kedo-an netum Arnam aphan ronon, nangtum akero parjulongnon.

⁹La etum aphan pareng-lo, lapen pachingkoitoitedet-lo.

¹⁰Arnam nang netum aphan asat paphotoilo, me pen rup kepangthir asonsi nang netum aphan asat paphotoilo.

¹¹Nang netum aphan pham along pachedantoilo, lapen netum anung along anghor kardik nebat-lo.

¹²Netum aphuthak nehotur atum patekung-long-toilo, netum me lapen langthepi ajo dam nang-lo, bonta nang netum aphan kejokvan adim nangvanlo.

¹³Nanghem along kephrin athok ne vanji, nangphan kechaktang ason ne nangpiji.

¹⁴Ne kesung ahut ne nangpiji pu kepu ason ne nangpiji.

¹⁵Dovan athak kephrinji aphan biresak ne nangpiji, chainong lapen bi-heihei athok ne nangpiji, lapen sining angsong amehi arlupo.

¹⁶Vang-ra arjunon, Arnam aphan man kepi atum an, lapen la nephan kopi klemloma nangthanpo.

¹⁷Kerap kelongjisi ne laphan hang-lo, laphan ne lun-heihei pen rolo.

¹⁸Ne jongsi nepap-heihei nening arlo chebibomlote, HEMPHU nephan ne arjujedetji apot-lo.

¹⁹Bonta Arnam ahokpetsi nephan no chedenlo, la ne kardom arjutang-lo.

²⁰Ne Arnam aphan chorolo, pima la ne kardom dengmome, mate la kechemitme akanghon ne pen paheloledet-lo.