Read Karbi LUN 68 Bible Online

LUN 68 - Karbi bible

LUN 68

¹Arnam thursi la hotur atum aphan papratseilo. Laphan kehijim atum remsi kat-lo.

²Mehi kebutphu asonsi latum aphan la phlung-et-lo. Me angno jo-ir kangjir asonsi Arnam angno kehingno atum virlo.

³Bonta la angno dhoromi atum chehok-lo lapen aning arong-lo, latum aning arongsi chehokphrolo.

⁴Arnam aphan lunnon, la amen aphan kero alun lunnon! Inghun athak pen kevang abangphan lunnon; Alangli menke HEMPHU, Alangli ingno chehoknon.

⁵Kardomhemthepi kangthir arlo kedo Arnam, jangreng aphan ke-ora lapen hemepi aphan kerai a-Bang.

⁶La hemkave abangphutin kedoji ahem ehum pilo, lapen phatek kebeng atum aphan kejok aning arong anat japonlo, bonta ebe kethurkrap abang rongbansi donangpo.

⁷O Arnam, nang nangrat aso aphan keja ahut, kejejangtang ajo nang kedam ahut,

⁸pirthe klemhurlo lapen sining pen arve nangklolo, pima Sinai Arnam vang-lo Israel a-Arnam vang-lo.

⁹Nang dorphlup arve pajang-lo, lapen kanghangset alongle pamelo,

¹⁰hadak nangrat aso atum ahem chekimlo, nang jinsosi keduk aphan nangpilo.

¹¹HEMPHU hukum pilo, lapen ongdung birta kepachon atum birta ponlo.

¹²“Recho atum lapen halatum aron-armu kattang-lo!” Kelongtang amar arloso atum hem arlo chethak-lo:

¹³Rup pen kedip vothung nangnak arje, la arveng ajukave aser pen doilor. “Ron kechedan arni kopisi nang ajehak atum, biresak aroi ajo sakok loma?”

¹⁴Zalmon Anglong arecho atum aphan, Jakongkethenei Arnam papratsei ahut, La hadak ar-e-kelok athan paklolo.

¹⁵Inglong kethenei ke Bashan helo, aphuchong kedo-o anglong-lo!

¹⁶Nangphuchong-heihei pen, kopisi Arnam kedoji kangvaitang anglong aputhak nang langremloma? Hadak HEMPHU kaike doverpo!

¹⁷La ke-ongdung suri suri jakongkethenei aronhemkonglong pen, Sinai Anglong pen adim kangthir arlo HEMPHU vang-lo!

¹⁸La angsong arludamsi la along ongdung keneptang aban ponlo; la kethurkrap amonit atum pen dan-heihei long-lo. Hadak HEMPHU Arnamsi dopo.

¹⁹HEMPHU aphan chorolo, la arnivangta etum aphan ale pen epilo; la etum aphan kepajok Arnamlo.

²⁰Etum a-Arnam ke kepajok Arnamlo La HEMPHU etum a-HEMPHU, alangli etum aphan kethi pen epajok-lo.

²¹Arnam chenamsi alangli ahotur atum aphu pangjepo, halatum apap atovar-heihei keklembom atum aphan.

²²HEMPHU putang-lo, “Bashan pen nang hotur aphan vanthupo, latum aphan talopi aklong pen ne vanthupo.

²³Lasi nangtum halatum avi pen chingroilongpo, lapen nangtum amethan atum aninghang an chonglek longpo.”

²⁴O Arnam, nang kehai akebar kadokaveta thek-longpet-lo, Arnam akechejeng, ne recho, hala kangthir ahem arlo anat.

²⁵Lunse atum aphrang, duhuidi atum angbong, arlosomar atum prakso kethip.

²⁶“Arloso atum kechetong along Arnam aphan ronon; Jakob aso-asu an HEMPHU aphan ronon!”

²⁷Benjamin vang paphrangnon, akebinei akhei, laso aphi Zebulun lapen Naphtali ajalin atum.

²⁸Nangjakong chepaklangnon O Arnam, netum aphan nekeklempi ajakong;

²⁹Jerusalem nang Kardomhemthepi pen, hadak recho atum nangphan dan-di-heihei nangkevanpi adim.

³⁰Ijip aphan ingchektha la arpik ajo a-ingnam apilo; det-heihei aphan ingcheknon latum ke aso pen pen chainong api ahurlo, nangphan latum angphun patongkiketik an, lapen halatum arup dan nangpipetik an. Ron kechedan aningkedok arat atum aphan papratseinon.

³¹Det apherangke atum Ijip pen vangpo, Sudan aso atum Arnam kardom nang chelangdunpo.

³²Pirthe adet an Arnam aphan lunnon, HEMPHU aphan kero alun lunnon,

³³sining karlu a-Bang, hako asining, laphan arjunon asekethe akehangser pen.

³⁴Arnam ajakong pachethangtha, Israel aputhak la adak-atur, Sining angsong la ajakong.

³⁵La ahem Kangthir pen kevang ahut, Arnam ko-an kepherememe atheng-loma, Israel a-Arnam! La arat atum aphan jakong-horang chepilo. Arnam aphan ronang!