Read Karbi LUN 69 Bible Online

LUN 69 - Karbi bible

LUN 69

¹Nepajoktha O Arnam, Lang nechethok an inglumtang-lo,

²Ne inghan karnuk ajo inglimtang-lo, lapen hadak longle kangtang ave; lang karnuk ajo ne vangtang-lo, lapen adihu ne inglumrang-lo.

³Kerap kehang ong ne ainiruilo, lapen nechethok sotang-lo. Nang pen kerap kecholang ong ne mek so-ang-lo.

⁴Nephan athe avepin pen kehijim atum, nephu achu apar latum ongmulo. Nebe thursi ne hotur atum chobeilo, Latum ingtangpik lapen nephan kepathiji aninghang-lo. Ne kechonghuhepin amar latum aphan voi nangji pu nehang-lo.

⁵Nepap-heihei O Arnam nangpen patu-un-e; nang chini ne ko-an kejok-lu loma.

⁶Nangphan kechiki atum aphuthak ne pen ajok patherak-ri; ninghang aling Keklem-un a-Bang Jakongkethenei HEMPHU! Nangphan karcho atum aphan kelangrem, ne pavanlongri O Israel a-Arnam.

⁷La nangphan ajoksi nephan ingchek, lapen ne ketherak pen chedip-lo.

⁸Ne korte angno ne kechinine abang asonlo, nehem asangho atum aphan ne bang adet asor plang-lo.

⁹Nang Kardomhemthepi aphan ne nebang arlo me asonsi necholo, nangphan kepinrem akangchek nephuthaksi nangklolo.

¹⁰Ne ningduk ape pensi ne chingchoisi an-humlo, lapen latum nephan ingnekchoilo.

¹¹Ne ningduk achoisi chingchoilo, lapen latum nephan ingnekchoilo.

¹²Nelam latum tovarpi along chethanlo, lapen horjunthekpo atum nephuthak lun bondailo.

¹³Bonta nephan ke, ne nangphansi ardomji HEMPHU; Nethaktha, pima nang kangvai apor ahut. Nethaktha, pima nang kanghon thepik; Pima nang kepajokji pu kechechak chebilo.

¹⁴Inghan ajo kejang pen nepajoktha, ne hotur atum lapen langthepi pen nepajoktha;

¹⁵Langthepi nephuthak pavanglongri, nephan karnuk ajo pajanglongri, mate tipit arlo pajanglongri.

¹⁶Nethaktha HEMPHU, nang kechemitmepin akanghon akemesen pen, nang kangjinso kethepik pen nenat chetevartha!

¹⁷Nangban pen nang chepaturi, ne sungpik-lo, non nethaktha.

¹⁸Nelong vang-ra nepajoktha, ne hotur atum pen nepajoktha.

¹⁹Nang chini nephan kopusonsi ne ingtonloma, nephan kopusonsi nelangrem lapen nepinremloma; nang nehotur an aphan thek-long-lo.

²⁰Kangchek nening paphukdak-lo, lapen ne rengnodak-lo, kangjinso abang aphan nening chethelo, bonta baduta ave. Ning parong abang aphanta, bonta ne longledet-lo.

²¹Ne ingchirlote, latum nephan bikarsi nepilo; ne ingit lote, latum nephan hanthorsi nepilo.

²²Halatum akecho-kejun halatum akevir paplangnang, lapen halatum kangthir achojun halatum akevir paplangnang.

²³Latum amek selok-etjile arbunon! Latum anung kaiketa pa-ainilainon!

²⁴Latum aphuthak nangning thinon, nangningkethi halatum paphoset-lonang.

²⁵Latum amukam-heihei pasamphridang nang; latum apehem-heihei along akereng inutbakta padolongledetnang.

²⁶Nang aduk kepitang abangphan latum areng pasolo, nang areng kepasotang abang alam latum chethanlo.

²⁷Latum apap-heihei tok-ra bikoknon, nang kejok along latum aphan apharman padolongri.

²⁸Kereng atum aloh pen latum amen papraidet tame, Nangrat atum along latum aphan parlo ponpedetnang.

²⁹Bonta ne solo lapen donolo, Nerungtangtha O Arnam lapen nepajoktha!

³⁰Eson alun pen ne Arnam aphan roji, laphan kero kepi pen ajok ne la akethe pachethangji.

³¹La aphan chainong athok kepi apar HEMPHU aphan aning padokmuji, Chainong alokethe athok apar memuji.

³²Kechenek kepho atum la thek-long-lote latum chehokpo; Arnam aphan karcho atum aning rungpo.

³³Keboi atum aphan HEMPHU ano chedenlo, lapen arat atum kebeng angdeng kedo ahut la tengnene.

³⁴Arnam ronang, O sining lapen pirthe; talo-heihei lapen la arlo kedo-an api.

³⁵La Jerusalem pajokpo, lapen Judah arongso-heihei kimthupo. La arat atum hadak dopo lapen longle cheraipo.

³⁶La aban atum aso-asu la cholongpo, lapen laphan kechinghon atum an hadak dolongpo.